Asteburu zoriontsua izan dute Laudioko Tenis Klubean. Izan ere, Arabako Master Txapelketan aritu dira (lurralde historikoko kategoria bakoitzeko zortzi jokalari onenek parte hartzen dute proban) eta bost domina ekarri dituzte etxera. Gasteizko Peña Vitorianan jokatu zuten proba.
Zehazki, Ander Urquiza haur kategoriako txapelduna izan zen, baita Sare Esturo eta Jon Luja, biak 10 urte azpiko kategorian. Bigarren postua eskuratu zuten Garazi Gardokik -Esturoren aurka jokatu zuen finala- eta Irati Castedok, junior kategorian.
Klubak goraipatu du kirolari laudioarrek gaitasuna dutela Gasteizko zein hiriburuko bestelako klubekin lehiatzeko, nahiz eta herri batekoak izan.
Halaber, azpimarratu dute tenisak osasun oso ona duela udalerrian, parte hartzaile ugarirekin. Hain zuzen, hasi den denboraldian ekin diote klaseak eskaintzeari Latiorro Eskolan, La Milagrosa Ikastetxean eta Laudio Ikastolan.
Edonola ere, laudioarrek erronka gehiago izango dituzte berehala. Adibidez, Sevillara joko dute nazioarteko txapelketa batean lehiatzeko eta asteburuan Errioxako, Eusko Autonomia Erkidegoko eta Nafarroako tenis jokalarien kontra neurtuko dituzte indarrak, Espainiako Estatuko bigarren mailara igotzeko.