LIDL enpresa multinazional alemaniarrak 2021ean utzi zuen Laudio Langraitz Okan duen biltegi berrian -askoz handiagoa- zentratzeko bere jarduera ekonomiko eta, bereziki, logistikoak.
Ia bi urtez hutsik egon ondoren, enpresak uztailean saldu zion Gardeako pabiloia Barquín y Otxoa garraio konpainiari. Azken enpresa horrek 20 urte ditu eta Ortuellan, Gasteizen eta Kantabrian dauzka azpiegiturak. Horiek eta Laudiokoa baliatzen dituzte Barquín y Otxoan hozkailuak dituzten 120 kamioirekin lan egiteko.
2019an abiatutako prozesua burutzea
Salmenta horrekin LIDLek guztiz utzi du Laudio. 2019an ekin zion horri. Lehenik eta behink Langraitz Okako Los Llanos poligonoan erosi zuen orubea eta gero 36.000 metro karratuko biltegia eraiki zuen bertan.
2021eko urriaren 17an joan ziren Aiaraldean zeuden 200 langileak Langraitzera.
Prozesua sindikatuekin negoziatuta garatu zuen LIDLek eta, ondorioz, behargin gehienek mantendu zuten lanpostua. Gutxi batzuek, ordea, lana utzi zuten borondatez eta baten batek ardura aldaketa eskatu zuen, dendetan beharrean aritzeko. "Hala ere, langile batek, dendan hasi eta gero, Laudiora itzultzea erabaki du", azaldu zuen LAB sindikatuak.
Langile erakundeek negoziatu zuten beste puntu garrantzitsua izan zen autobusarena. Hala, garraio hori eskaintzen du enpresak Laudiotik Langraitzera egunero joateko.