Pelikula edo antzezlan ezagunen bertsioak taularatu ohi dituzte Oihala Zabaltzen taldeko kideek, baina salbuespen berezia egin zuten iragan asteartean. Komedia propioa aurkeztu zuen Laudioko antzerki amateur taldeak, Solastiar emakume elkartearekin batera antolatutako emanaldi bikoitzean.
Azaroaren 25eko egitarauaren barruan antolatu zuten jarduera. Hori dela eta, indarkeria matxistaren aurkako perfomance laburra hezur-haragitu zuten lehenbizi. Ondoren, tonoa erabat aldatu zuten, El dilema de Paco Pepe antzerki obrara igaroz.
Komedia bat izan arren, matxismoa eta gizontasuna bezalako gaiak ere izan zituen hizpide obrak. Paco Peperen istorioa kontatu zuten Oihala Zabaltzeneko kideek. Bere emaztearekin batera egiten du lan Paco Pepek, enpresa berean. Lanpostu bera dute, baina Paco Pepek soldata eta baldintza hobeak ditu, bere emazteak gaitasun eta ikasketa gehiago izan arren. Halako batean, enpresako buruak biak deituko ditu bilera batera, eta Paco Pepe ziur dago postuz igoko dutela.
Arrakasta nabarmena izan zuen obrak. Laudioko Lamuza parkeko Kasinoa bi pasetan bete zen, eta Solastiarreko kideek kafea eskaini zuten bi saioen artean.