Informazioaren eta Komunikazioaren Teknologien arloan euskararen erabilera sustatu eta euskarazko kultura digitala ezagutzera emateko helburuarekin Xare, Euskarazko Kultura Digitalaren Jardunaldien lehenengo ekimena burutu dute gaur Laudion. Bertan izan dira Laudio Institutuko, Zaraobe Institutuko eta Laudio Ikastolako batxilergo mailako hirurehun ikasle.
Lamuza Parkeko Kasinoan egin dute harrera ekitaldia 9:00etan, eta, jarraian kultura digitalean murgiltzeko hiru espazio desberdinetan banatu dira ikasleak: Kultur Etxeko Ikas Aretoan, Liburutegi zaharreko Era Aretoan eta Lezeaga espazioko Jolas Aretoan. 3D inprimagailuak, bideo-joko mahaiak, musika nahasteko aplikazioak, errealitate birtualarekin jolasteko lanabesak eta beste hamaika dispositibo digital martxan izan dituzte gazteek goizean.
Musikak ere izan du bere tokia gaurko jardunaldietan. Sara Zozaya artista donostiarrak kontzertua eskaini die gazteei Kasinoan.
Xare zikloa
Ikasturte honetan zehar Arabako, Bizkaiko eta Gipuzkoako hainbat herri bisitatuko ditu Xare zikloak. Laudio izan da bide horretan lehen geralekua. Lexuri Ugartek, Arabako Foru Aldundiko Euskararen eta Gobernu Irekiaren zuzendariak, “kultura digitala Gasteiztik ateratzearen garrantzia” azpimarratu du harrera ekitaldian. Laudioko Udal Gobernuko ordezkari gisa bertan izan diren Ainize Gastakak eta Nagore Gomarak ere "poz handiarekin" hartu dute Laudion ospatutako ekimena.