Eztabaida sortu du iragan osteguneko Greba Feminista Orokorrak Laudioko merkatari eta ostalarien artean. Apill-ek batzarra egin zuen greba baino hiru egun lehenago, gaia lantzeko, eta bertan ateratako ondorioak partekatu zituen gero, grebaren biharamunean.
Mertakari eta ostalarien elkarteak nabarmendu du "ehuneko ehunean" errespetatzen dituela grebaren arrazoiak, baina gaineratu du "pertsona eta establezimendu bakoitzak bere independentzia" izan behar duela grebaren aurrean nola jokatu erabakitzeko. Horri lotuta, "errespetu gehiago" eskatu dute "merkataritza, ostalaritza eta zerbitzu sektorearentzat", eta "ezinegona" helarazi diete greba feministaren antolatzaileei. "Gure ustez, mobilizazioen transmisore huts gisa baino ez gaituzte erabiltzen, baina ez gaituzte kontuan hartzen erabakitzerakoan (aukeratutako data, protesta egiteko modua eta abar)".
Apill-eko kideek nabarmendu dute sektorearen egoera "kritikoa" dela une honetan eta, ondorioz, ez dela "kontsumo-greba bat" antolatzeko unea.
Apilleko kideek uste dute establezimendu asko "ixtera behartuta" sentitu zutela euren burua iragan ostegunean eginiko Greba Feminista Orokorrean, eta horrek "gastu-ihesa" eragin duela, jendeak beste toki batzuetara jo zuelako erosketak egitera.
Ildo horretan, elkarteko kideek nabarmendu dute sektorearen egoera "kritikoa" dela une honetan eta, ondorioz, ez dela "kontsumo-greba bat" antolatzeko unea. "Negozioek ezin dute egun osoko itxiera onartu". Zehaztu dutenez, azken 5 urteetan 46 saltoki itxi dira herrian, "9 establezimendu urteko, batez beste". Horri lotuta, "auzokideen, erakundeen eta instituzioen laguntza" eskatu dute, "tokiko kontsumoa sustatzeko".
Jarduera protokoloa
Gauzak hala, etorkizunean egon daitezkeen bestelako grebetarako protokoloa zehaztu du Apill-ek. Funtsean, ezohiko batzar bat egingo dute horrelako mobilizazio egunak deitzen direnean, eta bertan erabakitakoaren berri helaraziko diete gero bazkide guztiei. Erabakia, baina, ez da loteslea izango; hau da, merkatari bakoitzaren esku geratuko da azkenean grebarekin bat egin edo ez erabakitzea.
Omniaren oharra
Omniak ere oharra plazaratu zuen sare sozialetan grebaren biharamunean. Alderdi laudioarreko kideek azaldu zuten grebarekin bat egin zutela, baina ez zirela arratsaldeko mobilizaziora bertaratu, "zenbait pertsona eta negozio ixteko erabili diren moduengatik". Horri lotuta, talde politikoko kideek nabarmendu dute pertsona bakoitzaren hautua izan behar dela mobilizazioekin bat egin edo ez erabakitzea.
Hego Euskal Herri osoan egin zen Greba Feminista Orokorra ostegunean, mugimendu feministak gehiego sindikalarekin batera deituta. Aiaraldean jarraipen zabala izan zuen egitasmoak, eta Laudio zein Amurrioko saltoki eta taberna gehienek itxi zuten. Saltoki handiago batzuk, aldiz, ateak ireki zituzten, Eroski kasu. Laudioko piketeak ordubete baino gehiago eman zuen merkatal gune horretako sarrera blokeatzen.
Hemen ikusi daiteke grebak eskualdean utzitakoen bideo-laburpena: