Patxi parrandazale peto-petoa zen, despistatu aurpegikoa eta begirada trufarikoa, baina oso bizkorra. Bere jakin-mina eta lurralde honekiko maitasuna Aziak dantza taldera eta Goikogane mendi taldera eraman zuen gazte-gaztetatik. Lanbide Heziketako eskolan zegoela, mugimendu antinuklearraren eta langile-mugimenduaren deialdietan parte hartzen hasi zen (Laudioko Aceroseko grebak eta abar).
Denborak aurrera egin ahala, mundua eta gizartea aldatu nahi zituen, errepresioaren aurkako mugimenduan eta euskal preso politikoen aldeko mugimenduan inplikatu eta militatzen hasi zen, Amnistiaren Aldeko Batzordeetan. Ez zuen inoiz musikarekiko maitasuna alde batera utzi eta Aziak dantza taldearen fanfarrearen sorreran parte hartu zuen, saxofoia jotzen. Urte oso errepresiboak ziren Euskal Herrian, eta 1986ko urtarrilean beste lankide batzuekin atxilotu zuten, Espainiako 4 espetxetatik igaro zen (Carabanchel, Alcalá-Meco, Herrera de la Mancha eta Langraitz) eta 3 urte inguru eman zituen preso.
Kartzelatik irtetean, HBko eta HASIko militantzia politikoan jarraitu zuen. Denborak aurrera egin ahala, bigarren lerro politikora pasa zen, baina beti argi izan zuen nor zen, nondik zetorren eta Euskal Herri aske baten alde borrokatzen jarraituko zuela.
Garaipenera arte beti, lagun!