“Laudion txinparta berriak sortzeko” jardunaldi politikoak egingo dituzte asteburuan

Txabi Alvarado Bañares 2024ko urt. 22a, 18:55
Deskargatu Info Ahotsak :

'Txao titis' kolektiboko kideek parte hartuko dute jardunaldietan, besteak beste. Argazkian, talde horrek toki berean eginiko ekimenaren une bat. / Aiaraldea.eus

Orbeko Etxean egingo dute ekimena, larunbat eta igandean.

“Txinpartak txikiak dira, ez dute asko irauten, baina une egokian sortzen badira, sua piztu dezakete. Eta suak, erre egiten du, baina baita berotu ere, eta, toki eta momentu egokian pizten bada, bidea argitzeko ere balio dezake”. 

Azalpen horrekin aurkeztu dituzte datorren asteburuan Laudioko Orbeko Etxean egingo diren Jardunaldi Politikoak. Hain zuzen, Laudion “txinparta eta su berrien sorrera sustatzea” izango da ekimenaren xede nagusia, eta bi eguneko egitaraua atondu dute horretarako. 

Larunbat goizean egingo dute lehen mahaingurua. Laudio eta Aiaraldeko okupazio eta autogestio esperientziak izango dituzte hizpide, mugimendu horietan azken hamarkadetan aritu diren hainbat kideren eskutik. 

Ondoren, bazkaltzeko aukera egongo da eta, bazkalosteko bingo musikatuaren ostean, bi solasaldirekin beteko dute arratsaldea. Alde batetik, Txao Titis kolektiboko kideek hartuko dute hitza. Iaz sortu zen kolektibo hori, mastektomia egin nahi duen Laudioko pertsona trans bati ebakuntza hori egiteko dirua biltzen laguntzeko. Hain zuzen, “Gorputz disidenteak militantzian” izango da eskainiko dute mahainguruaren ardatza. 

Jarraian, kanpotik bertaratutako gonbidatu batzuek hartuko dute hitza: Hego Euskal Herriko Etxebizitza Sindikatuen Sarekoek, hain zuzen. Eragile hori ere iaz sortu zuten hainbat etxebizitza sindikatu eta antzeko talderen artean, eta euren borroken nondik norakoen berri emango dute Orbeko Etxean. 

Eguna amaitzeko, musikaz gozatzeko aukera izango dute bertaratutakoek, Gadugi taldearen raparekin eta DJ Baka4-ren musikarekin. 

Igandean ere eskualdetik kanpoko jendea bertaratuko da jardunaldietan hitza hartzera. 12:00etan hasiko da “Krisi ekosoziala, desazkundea eta alternatibak” solasaldia, Sukar Horia talde ekologistako eta Otxantegi Herri Lurreko kideen eskutik. Bazkalostean, aldiz, Laudiora begira jarriko dira bertaratutakoak, asanblada irekia egingo baitute herrian garatu daitezkeen proiektu edo egitasmoen inguruan hausnartzeko. 

Bazkarietarako izen ematea, osteguna baino lehen

Jardunaldietako jarduera guztiak izango dira doakoak. Hori bai, bazkarietan parte hartzeko izena eman behar da osteguna baino lehen, orbekoetxea@riseup.net helbidera idatzita. 

Horrez gain, antolatzaileek iragarri dute gaztelerazko zuzeneko itzulpena egongo dela hitzaldi guztietan. 

Politika Laudio

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide