Aretako ikastetxea ez da jadanik Fabian Legorburu, baizik eta Areta Herri Eskola. Horrela aitortu zuen Eusko Jaurlaritzak abenduaren 4an.
Izen aldaketa tokiko guraso elkarteak bultzatu zuen aurreko ikasturtean, eta prozedura osoa bete dute horretarako. Berez, elkarteak adierazi dio inguruko ikastetxe guztiek egin dutela eta euren nahia ere bazela.
Izen berria aukeratzeko, gurasoek argi zuten Areta agertu behar zela, eta Herri hitza zein kontzeptua ere garrantzitsua zen eurentzat, horregatik erabaki zuten Areta Herri Eskola hautatzea.
Prozesuari dagokionez, gurasoek Laudioko Udaleko euskara teknikariarekin -Felix Mugurutzarekin- hitz egin zuten eta langileak txostena prestatu zien izen aldaketa babesteko. Gero, Laudioko Udalak onartu zuen aldaketa.
Hurrengo urratsa ikastetxean bertan egin zuten eta irailaren 18an gurasoen eta irakasleen artean adostu zuten Areta Herri Eskola izenaren alde egitea.
Jadanik izendapen berria ofiziala izan arren, hezkuntza zentroan Areta Herri Eskolako kartela jarri behar dute, eta gurasoek azaldu dutenez, denbora tartea igaroko da burutu arte.
Gauzak horrela, ikastetxearen izena ez da izango berriro Fabian Legorburu. Aipatu beharra dago gizonezko hori Aretako parrokoa zen Guda Zibila hasi zenean 1936ko uztailaren 18an. Sei egun barru hil zuten mendian. Guraso Elkarteak adierazi du izen aldaketa gauzatzean, arreta eskaini diotela modu ez mingarrian egiteari.