Glavista enpresako langileek kontzentrazioa eta prentsaurrekoa egin dute gaur Bilbon. Finean, beharginek salatu dute enpresaren etorkizuna blokeatu dela eta Eusko Jaurlaritzak, horren jakitun izan arren, ez diela ezer adierazi, ezta lagundu ere.
Izan ere, Glavista bere gain hartzeko prest zegoen balizko inbertitzailea -Amine konpainia-, ofizialki desagertu da eta inork ez die ezer adierazi langileei. Bozeramaileek salatu dute Guardian eta Amineren arteko elkarrizketetan Eusko Jaurlaritzako Ekonomia Sailak bitartekari lanak egin dituela eta oraindik ere ez duela ezer esan.
Beharginen iritziz, gertatutakoa Guardianen estrategia izan da, eta publikoki galdetu dute ea hori ere Eusko Jaurlaritzaren asmoa den.
Enpresako langileen ordezkarien aburuz, baldintza guztiak jaso dira Glavistaren kasuan Eusko Jaurlaritzak esku hartzeko eta inbertitzeko: industria proiektua eta inbertsoreak, esaterako.
Hori guztia dela eta, mezu zuzena zabaldu diete langileek gaur Arantxa Tapia eta Mikel Amundarain Ekonomia Saileko arduradunei: "Ez du balio soilik prozesuan egon eta bitartekari izatearekin. Berehala jarduteko urgentzia dago, zuek zaretelako multinazionalak, enpresa proiektuak eta lanpostuak suntsitzen eta blokeatzen uzten ari zaretenak."