Asier Sanchez aretarra izango da biharko finaletako protagonistetako bat. Izan ere, Herriaren VIII. Promesa Txapelketako finalean arituko da Oier Elorz Upo Mendiko taldekidearekin. Printzipioz, Campo eta Plazaren aurka neurtu behar ziren, baina lehenengoak mina hartu du belaunean eta Palaciosek beteko du hutsune hori.
Sanchezek erronka zaila izango du eta etxean lehiatuko da, gainera. Iaz finaleko atarian geratu ostean, aurtengo edizioan finalerdietara pasa zen zuzenean, bederatzi bikotek eman baitzuten izena txapelketan eta guztiek ezin zuten final laurdenetan parte hartu.
Edonola ere, jokatutako partida bakarra oso bizia izan zen. Uriarte (Lezama) eta Inhar Manterola (Herriaren) izan ziren aurkariak eta 20-12 galtzen joan arren, markagailua irauli eta 21-22 irabaztea lortu zuten Sanchezek eta Elorzek. "Etxean jolastea beti ez da erreza izaten eta bai Asier, Aretarra izanik, zein Inhar (Laudio) nahiko urduri ibili ziren", adierazi dute antolatzaileek.
Bestalde, Herriaren XXVII. Txapelketako finalean, Prado-Merino II eta Zubizarreta IV.-Garmendia bikoteen artean erabakiko dute nor izango den irabazlea.
Sarrera doakoa izango da jende guztiarentzat eta partiden artean hainbat zozketa egingo dituzte, umeentzako eskupilota pilotak banatzeko, besteak beste.