Laudioko Udalak alegazio-txostena prestatu eta bidali dio Eusko Jaurlaritzari eta exijitu dio Larragorriko azpiegitura eolikoa eraikitzeko prozedura etetzea.
"Plan hau bateraezina da udal-plangintzak paisaia-balioak babesteko ezartzen dituen mugekin, HAPOk Paisaia Babesteko Eremu gisa kalifikatutako lursaila baita. Gainera, energia berriztagarrien LAPak -Lurraldearen Arloko Planak- zehazten duenaren arabera, energia eolikoa eskala handian ekoiztea babes berezikotzat jotako eremuak babesteko edo berreskuratzeko printzipioaren aurkakoa da, kasu honetan bezala", argudiatu du Alvaro Barrios Ingurumen zinegotziak.
Hori guztia aintzat hartuta, instalazioa bertan behera uztea eskatu dio Udalak proiektua onartzeko eskumena duen organoari. Izan ere, tokiko erakundearen aburuz, Larragorri Parke Eolikoa bateraezina da Udalaren hirigintza-plangintzarekin eta lurraldea antolatzeko tresnekin, horien babes- edo berreskuratze-printzipioek debekatzen dutelako babes bereziko eremuetan horrelako instalazioak jartzea.