Zer iritzi duzu azken asteetako lehen sektoreko mobilizazioen inguruan? Bat egiten duzu?
Bai, noski egiten dugula bat mobilizazioekin. Gu baserritarrak gara, baserritik bizi gara eta justuki biziraun dezakegu. Guk behiak ditugu eta ezin dugu ia hauen pentsua ordaindu ditugun lursailekin. Laguntzarik ez badago, laster desagertuko da lehen sektorea. Nire alabak, esaterako, ez du familia negozioarekin jarraitu nahi, ez duelako etorkizunik ikusten bertan.
Zeintzuk dira tokiko nekazarien aldarrikapen nagusiak?
Alde batetik, erretiroa hartuko dugunoi merkatura etortzen uzten jarraitzea. Izan ere geroz eta zailtasun gehiago ari dira jartzen. Guk etxerako ekoizten dugu eta soberakinak jaisten ditugu azokara, hori egiten jarraitu nahi dugu, autokontsumoa sustatuz.
Ekologikoan egiten dugu lan, sasoian sasoikoa ekoitziz. Ogia ere egiten dugu baserrian.
Zer zailtasun dituzue zuen egunerokoan?
Denetarik, egunez egun traba gehiago ditugu. Duela urtebete Ticket BAI sistema jarri zuten merkatuetan, eta gu negozioa abandonatzeko zorioan egon ginen.
Erregaiaren prezioak ere izugarri egin du gora, ez da errentagarria traktorea piztea ere. Ongarriak ere garestitu dira… Denak egin du gora!
Udaletxeak ere egundoko trabak jarri izan dizkigu. Nik lehen baserrian txerria hil eta odoloste batzuk banituen soberan, arazo barik jaitsi ahal nituen azokara, orain ezinezkoa dut hori. Osasun ziurtagiria atera behar izan dut etxean ditudan hogei olioentzako, 5.000 oilo dituen baserritar handi batek bezain beste ordiandu behar dut, eredu industriala ari dira sustatzen. Lehen baserritarrak haien soberakinekin jaisten ziren merkatura, orain esplotazio handien exijentziak bete behar ditugu lau sagar saltzeko. Bide honetatik jarraitzen badugu, baserri txikiak desagertu eta eredu industriala gailenduko da.