Laudioko Udaltzaingoko buruzagia kargutik kendu du Udal Gobernuak. Otsailaren 13an kargugabetu zuten ofizialki, baina gaurko Udal Osoko Bilkuran eman dute erabaki horren berri. Ainize Gastaka alkateak eskaini ditu gaiari buruzko azalpenak, “berebiziko garrantzia” duela argudiatuta.
“Udaltzaingoa alkate honen kezka handi bat da, nire kezka handi bat da”, adierazi du gobernuburuak. Nabarmendu duenez, “kalitatezko eta gertuko polizian sinetsita” dago, “herritarrentzako eta herriarekin lan egiten duena eta berehala erantzuten diena gatazkei, eraginkorra eta herritarren egunerokoarekin konprometitua”.
Ildo horretan, poliziaren agintearen muinean “konfiantza eta elkarlana” egon behar direla uste du alkateak. Bere hitzetan, “orain arte ez da hori egon”.
Gastakak aitortu du “zaila eta gogorra” dela horrelako erabakiak hartzea, eta nabarmendu du “erabateko konfiantza galera” izan dela erabaki hori hartzea bultzatu duena. “Hemendik aurrera, gertuko Udaltzaingoa lortzeko proiektua abiatzeko pausoak ematen hasiko gara, gertutasunezko polizia lortzera bidean”.
Iñigo Martinez Cerrillo zinegotziak eman ditu erabakiaren gaineko xehetasun gehiago, bilkuraren ostean komunikabideen aurrean eginiko adierazpenetan. Azaldu duenez, “izendapen askearen bidez” hautatzen da polizia burua eta, beraz, nahiko ohikoa da udal gobernu aldaketa dagoenean kargu horretan dagoen pertsona ere aldatzea. “2011n Bilduk hala egin zuen udal gobernu honetan sartu zenean, eta orain arte egon den pertsona aurreko udal gobernuak hautatu zuen”, gogorarazi du Martinez Cerrillok, eta gaineratu du askotan legealdi hasieran egiten dela buruzagi aldaketa, baina oraingoan nahiago izan dutela denbora hartu "udalaren benetako egoeraren argazkia" izan arte.
Bukatzeko, zinegotziak iragarri du buruzagi berria hautatzeko prozesa jarriko dutela martxan, hautagai eta proiektuak jasotzeko epea irekiz.