Atzoko Udal Osoko Bilkuran onartu ziren Laudioko Udalaren aurtengo aurrekontuak. 25,3 milioi euroko plangintza ekonomikoa izango da, iazkoa baino %1,38 handiagoa.
Aurrekontuekin batera, udal antolaketa berria onartu dute. Sei arlotan banatu dute, eta hau izango da bakoitzari aurten esleituko zaion diru kopurua:
Gauzak hala, Udal Gobernuak nabarmendu du igoerak aurreikusi dituztela hainbat esparrutan:
- Ingurumena eta jasangarritasun energetikoa (%46,42ko igoera)
- Gobernantza feminista (%2,82)
- Adikzioen prebentzioa (%21)
- Osasun publikoa (%4)
- Enpleguaren sustapena (%4,24)
- Udal liburutegia (%15,45)
- Kultura eta kirol eragileentzako dirulaguntzak (%15)
Diru-sarrerei dagokionez, hauek dira Udalak aurreikusi dituen finantzazio-bide nagusiak:
Inbertsioak, zehazteke
Dena dela, aurrekontuaren zati handi bat definitzeke dago oraindik. Udal gobernuak berak jakinarazi du atzo onartutakoa “aurrekontu orokorra” baino ez dela, eta “izaera tekniko nabarmena” duela. Datozen asteetan zehaztuko dute inbertsioen atala, behin jakinda 2023. urteko kitapenak zenbat diru uzten duen soberakin moduan.
Aurreratu dutenez, “partaidetza prozesu bat” jarriko dute abian martxoaren amaieran, eta bertan zehaztuko dute zertan eta nola inbertitu. “Udalerriko aurrekontu-politiketan auzotarrek eragin eta erabaki dezaten, erabakigarria izango da auzoko batzarretan eta kontseilu sektorialetan parte hartzea”, nabarmendu dute. Orain arte egin diren batzarretan ekarpen ugari jaso dituzte dagoeneko, eta aurreikusi dute horietako gehienak aurrera eraman ahalko dituztela, Udalak zortzi milioi euro inguruko soberakina izan dezakeela kalkulatzen dutelako. Hala ere, aipatu bezala, 2023. Urteko kitapena amaitzen denean jakingo dute zehazki zenbat dirurekin kontatuko duten.
“Udalerriko aurrekontu-politiketan auzotarrek eragin eta erabaki dezaten, erabakigarria izango da auzoko batzarretan eta kontseilu sektorialetan parte hartzea”
PSE-EErekin akordioa
Hala ere, udal gobernuak zehaztu du dagoeneko diru-partidak batzuk nora bideratu, akordioa erdietsi baitu PSE-EErekin, alderdi horren hainbat proposamen aurrekontuan txertatzeko. Guztira 404.260 eurotan baloratutako partidak proposatu ditu alderdi sozialistak, Gaztelekura, kultur programetara edota patio inklusiboetara diru gehiago bideratzeko, besteak beste.
Akordioarekin pozik azaldu zen Loli Muriel zinegotzi sozialista atzoko plenoan, udal gobernuaren “borondate onaren erakusle” dela aitortuta. Hala ere, nabarmendu zuen hori “lehen urratsa” baino ez dela “konfiantza berreskuratzera bidean”. Horri lotuta, PSE-EEko kideak salatu zuen Tokiko Gobernu Batzordean parte hartzeko betoa ezarri zitzaiola, “Omniak proposatuta eta EH Bilduk onartuta”. Gauzak hala, Murielek uko egin zion aurrekontuen alde bozkatzeari, abstentzioaren alde eginez.
EAJren kritikak
Alderdi jeltzaleak, bere aldetik, aurkako botoa eman zien aurrekontuei. Ander Larrinaga zinegotziak azaldu zuen botoaren zentzua. Bere ustez, plangintza ekonomikoaren onarpena “tramite hutsa” bilakatu du udal gobernuak, taldeen arteko eztabaida ekidinez.
Horrez gain, aurrekontuetan inbertsiorik jaso ez izana ere deitoratu dute jeltzaleek, plenoaren ostean komunikabideetara bidalitako prentsa ohar batean: “Oso ondo dago esatea a posteriori irekiko den eztabaida dela. Baina ez ditzagun herritarrak engainatu; eztabaida hori martxoan hasteak ondorio argia du: onarpenaren, jendaurrean jartzearen, alegazioak ebaztearen eta ondorengo kontratazio-prozeduren artean ezin izango da inbertsio garrantzitsurik egin datorren urtera arte”.
Gainera, EAJk nabarmendu du handitu egin dela gobernu taldeko zinegotzien dietetara bideratutako diru-partida: "2020an 137.000 euroko gastua egin zen kontzeptu horretan, eta aurten ia 162.000 eurokoa izan da".
Jeltzaleen kritikei plenoan bertan erantzun zien Iñigo Martinez Cerrillo zinegotziak. Aurrekontuak egiteko modu berriaren defentsa egin zuen EH Bilduko zinegotziak, eta ziurtatu zuen oposizioko taldeek aukera izan dutela ekarpenak egiteko, PSE-EE jarriz horren adibide moduan.
Hemen ikusi daiteke atzoko bilkura osorik: