Laudioko EAJk oharra zabaldu du salatzeko asteburuan Udalak ez zuela ikasgela zerbitzurik eskaini liburutegian. "Tamalgarria da Gobernu taldeak liburutegiko ikasgelak ixtea erabaki izana ikasleentzat hain garrantzitsua den une batean, aldez aurretik abisatu gabe eta horrek herritarrengan izango lukeen eragina kontuan hartu gabe", adierazi du Ander Añibarrok.
Jeltzaleen bozeramaileak aipatu du bera alkate izan zenean abiatu zutela zerbitzu hori eta oso erabilia dela. Halaber, kritikatu du Aste Santuan ere itxita egongo dela.
"Hori al da gobernuak hainbeste predikatzen eta predikatzen zuen Laudioko aldaketaren babes handia gure bizilagunen kulturari eta hezkuntzari?", galdetu du opozisioko zinegotziak, "ikasleei ikastera une erabakigarri batean joatea eragozteaz gain, urte askotatik herrian eskaintzen den larunbat goizetako liburuen mailegu-zerbitzua ere kendu egiten dute".
Berez, ostiralean argitaratu zuen Laudioko Udalak bere sare sozialetan ez zela ikasgela zerbitzurik egongo asteburuan. Halaber, aipatu zuen espero zuela asteburu honetarako arazoa konponduta egotea eta barkamenak eskatu zituen sortutako eragozpenengatik.