Asteburu bizia izango du Aretako frontoiak. Izan ere, gaur 19:00etan Euskal Herriko Kluben arteko finalak egongo dira jokoan. Jaialdia hiru partidak osatuko dute eta binakakoak izango dira guztiak.
Kadete kategorian Lapke eta Larraun arituko dira nor baino nor. Gazteen artean Upo Mendi eta Intxaurre izango dira aurrez aurre eta Oiarpe eta Oberena B izango dira finalistak 22 urtez azpikoen kategorian.
Master Laboral Kutxa
Igandean 17:30ean, aldiz, Euskal Herriko emakume pilotari onenetako batzuek hartuko dute kantxa. Berez, Master Laboral Kutxa Binakako Txapelketako 3. eta 4. postuak banatzeko partida jokatuko dute. Aurrez aurre izango dira Aldai-Bergara eta Beitia-Mendizabal.
Amaia Aldai (Dima, 24 urte) azken 3 urteetako (2021, 2022 eta 2023ko) lau t’erdi txapelketako irabazlea izan da. Berarekin egongo da Arrate Bergara (Tutera, 23 urte).
Euren aurkariak Olatz Beitia (Lekeitio, 21 urte, 2023ko Master Kaiolan txapelduna) eta Nora Mendizabal (Andoain, 20 urte, iazko Master Laboral Kutxako azpitxapelduna) izango dira.
Norgehiagoka hori baino lehen, Herriaren Pilota Elkarteko aurrebenjaminen partida egingo dute: Sare Albiñarratek eta Argia Ouedraogok Gasteizko bi nesken aurka jokatuko dute eta, gainera, pilota mistoko gazteen beste partida bat egongo da.
Doakoak izango dira partidu guztiak.