Atzo egun bizia izan zuten Laudio Institutuko ikasleek Südtirolen. Giro eguzkitsuarekin Schlanderseko School Sprachengymnasium ezagutzera joan ziren eta zuzendariak diskurtso txikia eskaini ondoren, lau tailerretan banatu zituzten bertako ohiturak, historia, abestiak, dantzak, karta jolasak... ezagutu eta ikasteko.
Talde batean bertako janaria sukaldatu zuten eta beste batean, adibidez, bertako hiru hizkuntzetan oinarrizko elkarrizketa txikiak izan zituzten (tokiko dialektoan, alemaniarrez eta italiarrez).
Ikasle bakoitzak bere harrera familiarekin bazkaldu ostean, ibilaldia egin zuten. Paseo horretan St Agidius ikustera joan ziren, haitz baten gainean dagoen XIV. mendeko baseliza.
Handik, haran osoa ikusi eta pasaia paregabeaz gozatu zuten. Tokia Kortsch herrian dago, Val Venosta bailararen bihotzean. Han ikasleei fitxa batzuk eman zizkieten galdera batzuen erantzunak topatzeko.
Galdera horien artean bazegoen bat duela aste pare jarraitutako tradizioari buruzkoa. Hain zuzen, suaren bitartez, negua aldentzen saiatzen dira eta eguraldi ona erakartzen. Horretaz aparte, herriko pertsonen izenak airera oihukatzen dituzte eta gurari onak eskatzen dituzte.
Amaitzeko, Schlandersera itzuli ziren eta familiekin bolatokira jo zuten.
Argazkiak: Laudio Institutua