Gaur Laudion aritu da Cake Minuesa eskuin muturreko kazetaria. Eguerdian ikusi dute zenbait lagunek herrigunean, hain zuzen, Gazako biktimak omentzen dituen monolitoaren eta Laudio Institutuaren aurrean dagoen LGTBI+ kolektiboaren aldeko mural baten inguruetan grabatzen.
Herritar horietako batzuk, Aiaraldea Komunikabideari azaldu diotenez, eskuin muturrari lotutako gizon ezagunarekin harremanetan jarri dira.
Esaterako, Laudio-Palestina kolektiboko bi kidek (bakoitza bere aldetik) topo egin dute berarekin eta argazki batzuk egin dizkiote monolitoaren alboan zegoen bitartean. Gogoratu beharra dago plataforma horrek sustatu zuela monolitoa eraikitzeko egitasmoa.
Laudioarrak txantxetan
Kazetariaren inguruan elkartu direnez eta ikusita beste herritarrengana jotzen zuela euren adierazpenak lortzeko, plataformako bi kideek txantxak egin dizkiote Minuesari, ea euretako bat elkarrizketatzen animatzen zen iradokitzeko. Minuesak galdetu die ea ez dagoen askatasunik Laudion grabatzeko, orain EH Bilduk gobernatzen duela, eta laudioarrek umorez erantzun diote baietz, bazegoela eta horregatik egin dizkiotela argazki batzuk eurek ere.
Elkarrizketa ez da asko luzatu, laudioarrek euren mandatuak egitera joan behar zirelako, baina agurtzerakoan Minuesari eta bere lankideei egun polita izatea opa egin diote eta horrek kazetariaren amorrua piztu du, zeinek honakoa erantzun dien: "jadanik ez duzue beldurrik ematen", herritarren harridurarako.
Minuesa, eskuin muturreko probokatzailea
Cake Minuesa valentziarrak zuzenbide ikasketak egin bazituen ere, ikus-entzunezkoen esparruan egin da ospetsu. Intereconomia, Telemadrid, El Toro TV edota OK Diarion egin du lan eta bere Youtube kanal propioa ere badauka.
Bere burua komunikatzaile eta umoregiletzat jotzen duen ekoizleak Jordi Evoleren erreportajeen eredua baliatu zuen, nolabait, eskuin muturreko mezuak zabaltzeko, hain zuzen, horrelako mezuak ongi etorriak ez diren testuinguruetan. Euskal Herrian behin baino gehiagotan egon da eta, adibidez, urtarrilean Euskal Preso Politikoen Aldeko manifestazioan agertu zen.
Guardia Zibilak 2019an atxilotu zuen El Valle de los Caídoseko basilikan sartzen saiatu zenean, gobernuak itxi ostean.
Eduardo Inda Amurrion
Aipatu beharra dago ez dela lehen aldia eskuin muturreko kazetariak Aiaraldera etortzen direla. Berez, 2019an Eduardo Inda OK Diarioko zuzendaria ere egon zen, kasu horretan, Amurrion.