Hauteskunde ekitaldia egin du PSE-EEk Laudion gaur eguerdian. Jorge Juez laudioarrak hartu du hitza lehenbizi, eta Espainiako Kongresuan PSOE bozkatu zuten 2.500 laudioarrei eskatu die berriro konfiantza ematea alderdiari, boza erabilgarria izango dela argudiatuta.
Hain zuzen, bi ideia azpimarratu dituzte Jorge Juezek zein Aroa Jilete Arabako zerrendaburuak eta Javier Hurtado Turismo, Merkataritza eta Kontsumo Sailburuak (azken hau bigarrena zerrenda arabarretan). Alde batetik, nabarmendu dute euren aldeko bozka dela eraginkorrena. "Europako, Espainiako eta Euskadiko erakundeetan gaudenak gara, erabakiak guk hartzen ditugu", aldarrikatu du Javier Hurtadok.
Ildo horretatik, Aroa Jiletek defendatu du sozialisten gobernantza eredua dela edozein koloreko alderdiekin akordioak lortzea: "Guk ez dugu galtzen denbora eztabaida identitarioan, guk herritarren ongizatean pentsatzen dugu".
Politikari guztiak ez dira berdinak
Halaber, errepikatu duten beste ideia da politikari guztiak ez direla berdinak. "Ez da gauza bera Azoreseko argazkian parte hartu zuena eta Irakeko gerran sartu gintuena eta Palestinako Estatuaren aitortza lideratzen duena", azaldu du Hurtadok.
Jiletek ere ideia hori defendatu du: "Ez da gauza bera proiektu aurrerakoia eta pertsonengan pentsatzen duena, sozialistena bezala, edo eskuinarena, eskubideak pribatizatu eta murriztu nahi dituena. Edo, beste aldetik, nazionalistena, denbora alferrik galtzen dutenak autogobernu gehiago eskatuz, kudeatu ordez".
Jorge Juezek, bere aldetik, goraipatu du Loli Murielek Laudioko Udalean edota Cristina Gonzalezek eta Ana del Valek Foru Aldundian lortutako dirua herriko azpiegiturak edo gizarte ongizate zerbitzuak bultzatzeko.