Euskararen eta Europako gainontzeko hizkuntza gutxituen aldeko aldarria zabaldu zuen Esti Urresolak asteartean Europako Parlamentuan, LUX sarien banaketan. Zinemagile laudioarraren 20.000 especies de abejas pelikula zegoen lan izendatuen artean eta, azkenean sariririk irabazi ez zuen arren, txalo andana jaso zuen Urresolak, parlamentarien aurrean eskainitako hitzartzeagatik.
Laudioarrak eskerrak eman zien jaialdiko arduradunei, bere filmari azpi-idatziak jartzeagatik Europako 24 hizkuntza ofizialetan, horrek “ate berriak ireki eta muga zaharrak hausteko” balio izan duela iritzita.
Ingelesez hitz egitera pasa zen jarraian, euskarari buruz solasteko. Hizkuntza “komunikazio sistema bat” baino gehiago dela aldarrikatu zuen, “estruktura sinboliko bat mundua ulertu eta sentitzeko”. 20.000 especies de abejas filmean dagoen hizkuntza aniztasuna jarri zuen horren adibide moduan: “filmeko 8 urteko haur transarentzat, euskara ez da komunikazio kanal hutsa, bere burua adierazteko modu askeago bat baizik, euskarak ez duelako genero markarik”.
Korrikako leukoaren aurtengo mezuko esaldi bat aipatu zien Urresolak parlamentariei: "Bertako esaldi bat aipatuko dizuet: ‘Mundu oso bat kabitzen da euskaran’. Nire galdera: euskarak badu tokirik mundu honetan?".
Simone de Beauvoir filosofoaren esaldi batetik tiraka, Urresolak nabarmendu zuen eskubide abstraktuak “aukera konkretuekin” batera garatu behar direla, bestela askatasuna “ilusio hutsa” izango delako. “Eskubide abstraktuez harago, hizkuntzek aukera konkretuak behar dituzte. Hizkuntza eta bere hiztunak benetako askatasunean bizi daitezen”, aldarrikatu zuen zinemagileak, eta galdera bat bota zien parlamentariei: "Zergatik ez euskara, galiziera, sardiniera, korsikera... parlamentu honetan? Ideia horren aurka daudenek argumentu ekonomiko edo logisitikoak erabiltzen dituzte sarritan, baina hizkuntza aniztasuna sustatzea, sariketa honetan egiten den bezala, bada ezberdina dena ikasteko aukera gisa ikustea. Hizkuntza aniztasunak kooperazioa eta bakea sustatzen ditu, inoiz baino garrantzitsuagoa diren aferak”.
Korrikari buruz
Bukatzeko, Korrika zer den azaldu zien Urresolak parlamentariei: "11 egunez, ehunka lagunek 2.800 kilometro egin dituzte Korrika herri batetik bestera, egun eta gauez, gelditu gabe, elkarri lekuko bat pasatzen, eta aurtengoa inoizko Korrikarik jendetsuena izan da. Lekukoaren barruan mezu bat dago, Garazi Arrula idazleak idatzi du aurtengoa. Bertako esaldi bat aipatuko dizuet: ‘Mundu oso bat kabitzen da euskaran’. Nire galdera: euskarak badu tokirik mundu honetan?".
Horri lotuta, "neurri eta aukera konkretuak garatzea" eskatu zien Urresolak parlamentariei, "hegemonia sinbolikoan ordezkatuta ez dauden pertsonen eskubide, identitate, errealitate eta hizkuntzak bermatzeko, benetako askatasun iraunkor eta egonkorra sustatuz”.