Ugarteko Gazteak elkarteak Bularreko Minbizi Metastasikoaren Kontrako Elkartasun Ibilbidea antolatuko du maiatzaren 5ean, igandea. 11:30ean abiatuko da Herriko plazatik, handik Zumalakarregiko biribilgunera joko dute eta Industrialdera gero. Malekoira helduko dira ondoren ibaiaren eta trenbidearen arteko bidetik, eta Batzalarrin kalera bertaratuko dira Zubiko Etxearen alboan dagoen zubitik. Zumalakarregitik jarraituko dute jarraian, Ugarte plazan amaitzeko, Sagastia inguratu ondoren.
Antolatzaileek gogoratu dute elkartasun ekimena izango dela eta, ondorioz, ez dela lehiakorra izango, nahiz eta norberak nahi duen moduan bete dezakeen. Izen-ematea Gorka eta Ugarte tabernetan, Ugarteko kioskoan eta Zuentzaten egin daiteke. 6 euro balio du eta parte hartzeagatik kamiseta oparituko dute.
Inskripzioa egiteko mugarik ez dago eta jadanik 200 lagunek egin dute. Hori bai, antolakuntzak nahiago luke ahalik eta lasterren jakitea ibiltarien kopurua, kamisetak apirilaren 26tik maiatzaren 3ra bitartean banatu nahi dituzte eta.
Xede ekonomikoa betetzeaz gain, gaixotasuna ikusarazi nahi dute, gogoratzeko ikerketa lan handia falta dela esparru horretan.
Bularreko minbizi metastasikoa
Jende ugarik pairatzen du bularreko minbizi metastasikoa. Gaixo gehienak emakumezkoak dira, baina badaude gizonezkoak ere. Finean, gaitza bularreko minbiziarekin hasten da, baina behin hori gaindituta, gorputzaren beste atal batean agertzen da berriro.
Bularreko minbizi metastasikoaren kontrako elkarteak Espainiako Estatuan lan egiten du eta hainbat herrialdetan ditu taldeak. Euskal Herrian badago ordezkaritza bat. Berta egiten den lana azaldu zuen Maiteder Intxaurraga ordezkariak Poliedroa saioaren lehen edizioan: