Igaro berri den asteburua bizia izan da Granja kiroldegian, baina amaiera zoriontsua izan du Laudioko jokalarientzat. Izan ere, jokoan egon da Arabako Saskibaloi Txapelketako haur kategoriako Lauko Finala, eta Sugarrak izan da irabazlea.
Laudioarrak konfiantzaz beterik heldu ziren lehiaketako azken txanpara, beste aurkari guztiak menperatu baitzituzten liga fasean, zailtasun berezirik gabe. Edonola ere, Lauko Finalean aurrekariek ez dute inolako baliorik eta berehala konturatu ziren horretaz.
Gauzak horrela, larunbatean Zabalganaren kontra neurtu zituzten indarrak eta hirugarren laurdenera heldu arte ez zuten lortu abantaila nabarmena ezartzea markagailuan. Azkenean, gasteiztarrek bultzada eginda, markagailu motzarekin bukatu zuten irabazten laudioarrek.
Igandean final elektrikoa
Behin finalera igarotzea lortuta, igandeko 18:00etan jokatu zuten txapelketa erabaki behar zuen norgehiagoka. Granja udal kiroldegiko harmailak jarraitzailez bete ziren eta partidaren presioa igo zuten.
Testuingurua, hasieran, Sugarrakeko jokalarien aldekoa izan zen eta, lehen bi laurdenen ostean, 20-11 izan zen emaitza. Partidaren bigarren zatian, ordea, gidoia erabat aldatu zen. Julen Vazquez klubeko presidenteak nabarmendu du Lakuakoek kategoria horietan erabiltzen ez den taktika baliatu zutela eta zonan defendatzen hasi zirela. "Oso arraroa da trebatzen ari diren maila horietan zonan jokatzea. Arruntena da kadeteetan egitea. Gure jokalariek ez dute inoiz landu eta ez zekiten nola erantzun. Azkenean, blokeatu ziren".
Txinpartak harmailetan eta kantxan
Taktika horri esker, Lakuako taldeak markagailua irauli zuen eta aurrea hartu zuen. Bere zaleek ere estutu zuten eta harmailetan nagusitu ziren. Finala galtzear zeudela zirudienean, ordea, Sugarrakeko hiru kidek taldea hartu zuten euren gain eta bultzatu zuten berriro abantaila lortu arte.
Laudioko zaleek giroa berotuta erantzun zuten eta nahiz eta Lakua berriro aurretik jarri zen, amaieran tokikoak gailendu ziren markagailuan, 41-38 emaitza estuarekin.
Indar eta kemen erakustaldiaren ondoren, Euskadiko Jokoak jokatuko dituzte hurrengo asteetan eta Vazquezek uste du badituztela irabazteko aukerak.