Aldatu gidoia ekimenak bere jarduera azalduko du ostegunean Faktorian, euskarazko ikus-entzunezkoak bultzatzeko

Erredakzioa 2024ko mai. 14a, 14:30

Aldatu gidoia ekimenak egindako irudia larunbateko mobilizazioaren berri emateko.

Manifestazioa egingo dute larunbatean 17:30ean Gasteizen eta euren aldarrikapenak azaltzeko solasaldia deitu dute Faktorian, ostegunean 19:00etan.

Irailean aurkeztu zuten Aldatu gidoia ekimena eta larunbat honetan helduko da planteatu zuten lehen erronka: mobilizazioa egingo dute Eusko Jaurlaritzako egoitzaren aurrean, 17:30ean.

Iniziatibaren exijentziak eta filosofia bertatik bertara ezagutzeko aukera bikaina eskainiko dute ostegunean Faktorian, solasaldia egongo baita ekimenaren sustatzaileetako batekin, 19:00etan. Fermintxo Zabala plataformako kidea prest egongo da zalantzak eta galderak erantzuteko, azalpenekin batera.

Berez, ekimenaren helburua da euskara jartzea komunikazioaren eta ikus-entzunezkoen erdigunean eta horretarako hainbat aldarrikapen ditu, erakunde publikoei dagokienez bereziki. Izan ere, plataforma babesten duten kultura, euskalgintza, sindikalgintza eta hezkuntzako 31 eragilek exijitu diote EITBri euskarari lehentasuna ematea.

Horrez gain, streaming plataformetan edota bideojokoetan euskara sustatzearen alde ere egiten dute Aldatu gidoia iniziatibako bultzatzaileek. Hauek dira Eusko Jaurlaritzari bideratutako aldarrikapen nagusiak:

  • Kultura eta Hizkuntza Politika Sailaren aurrekontuetan urteko %5 euskarazko ikus-entzunezkoetara bideratzea. Biztanleko urtean 9 euro.
  • EITBk Euskal Herri osorako jardutea.
  • Diru publikoz finantzatutako euskarazko bikoizketa-azpidatzi guztiak egokitu eta plataformetara helaraztea, Espainiako Estatuko legeak agintzen duen bezala.
  • Inklusioaren eta hizkuntza normalizazioaren ikuspegitik azpidatzien erabilera politika diseinatu eta erabilera orokortzea.
  • Zinema eta plataformetako euskarazko estreinaldiak iraunkorki promozionatzea.
  • EITBn euskarazko kulturari eta euskal sortzaileei lehentasunezko tokia egitea.
  • Bideojokoen industriako ehun asoziatiboarekin eta enpresarialarekin harremanak sortzea eta lan egitea.

Aiaraldea Ekintzen Faktoriak osatzen duen erakundeak (Aiaraldea Kooperatiba Elkarteak) ere bat egin du aldarriarekin, eta horregatik antolatu du osteguneko zita. 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide