Israelen “mendebaldeko konplizeak” salatu dituzte Laudioko elkarretaratzean

Txabi Alvarado Bañares 2024ko mai. 15a, 21:45
Deskargatu Info Ahotsak :

Dozenaka lagun batu dira Laudioko Gaztetxeak eta Aiaraldeko GKSk deitutako mobilizaziora.

Palestinarren Nakba izan zenetik 76 urte bete dira gaur. Efemeride hori baliatuta, mobilizazioa deitu dute Laudioko Gaztetxeak eta GKSk Lamuza plazan, “Israelen eta bere mendebaldeko konplizeen aurka”. 

Urteurrenari aipamena eginez hasi dute elkarretaratzearen osteko irakurketa. “Duela 76 urte, sionismoak palestinarren aurka abiarazitako erasoaldiaren ondotik sortu zen ofizialki Israelgo Estatua, Mendebaldeko potentzia inperialisten babesarekin”, ekarri dute gogora, eta nabarmendu dute gertaera hark “argi” erakusten duela “estatu sionistaren oinarriak Palestinako lurren okupazioa eta palestinarren aurkako kanporaketa eta erailketa izan direla hasieratik”. 

Israelek azken hilabeteetan eginiko sarraskia salatu dute Gaztetxeko eta GKSko kideek, baina gaineratu dute “Mendebaldeko gobernuen eta alderdi politiko profesionalen sostengua” dagoela “estatu sionistaren inpunitatearen oinarrian”.

Horri lotuta, PSOEren gobernuan jarri dute begirada: “Palestinaren aldeko adierazpenak egin eta laster Palestinako Estatua aitortuko duen arren, Israeli inoiz baino arma gehiago saltzen ari da eta estatu sionistarekin harreman diplomatiko, politiko eta ekonomikoak izaten jarraitzen du. Hau da, genozidioa aktiboki babesten ari da. Horregatik, guk Espainiako gobernuaren eta bere sostengu diren alderdien posizio hipokrita salatzen dugu”.

Horrez gain, nabarmendu dute “txanpon beraren bi aldeak” direla “palestinar herriaren aurkako sarraskia eta Mendebaldeko herrialdeen militarizazioa”. Horren aurrean, premiazkotzat jo dute “klase kapitalistari aurre egingo dion nazioarteko indar sozialista bat antolatzea”. 

Bukatzeko, deia luzatu dute larunbatean Palestinarekin Elkartasuna plataformak Iruñean egingo duen mobilizaziora batzeko. Jakinarazi dutenez, bertara joateko auto kedada egingo dute 10:00etan. 

Politika Laudio

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide