Laudioko Udalak iragarri du ekainaren 1etik aurrera egongo dela indarrean ibilgailuen abiadura baretzeko kanpaina. Neurririk deigarriena izango da Karmengo Ama Birjina eta Goienuri kaleen eta Areta eta Gardea kaleen artean abiadura handiko radar ibiltaria jarriko dutela, txandaka.
Horrez gain, beste bi gailu ere jarriko ditu tokiko erakundeak. Alde batetik, pertsonen presentzia antzematen duen argiztapen adimenduneko sistema bat instalatuko du Nerbioi kaleko zebrabidean, 32 eta 34 zenbakien artean. Bestetik, bi radar jarriko ditu Zumalakarregin eta Goikoplazan, abiadura-muga errespetatu den ala ez kontuan hartuta aurpegi zoriontsu edo triste bat erakutsiko dutenak.
Hori ez da guztia izango. Izan ere, “Lasai hartu, errespetatu abiadura” sentsibilizazio-kanpaina ere egingo da, hiri-eremu osoan ezarritako gehieneko abiadura errespetatzeak duen garrantziaz kontzientziatu nahi duena. Horrez gain, informazio-panelak jarriko dira landa-inguruneetan, abiadura-seinaleen ondoan, oinezkoen aurrean kontuz ibiltzeko eskatuz. Zehazki, Larrazabal, Arraño, Santa Luzia, San Bartolome, Santa Kurutze eta Gardeagotxi inguruetan egongo dira ikusgai.
Bide-hezkuntza
Ikastetxeetara ere zabalduko dute ekimena. Udako oporretatik bueltan, eta irailaren 22an ospatzen den Autorik Gabeko Munduko Eguna aprobetxatuz, trafikoari buruzko sentsibilizazio-kanpaina hasiko du Udalak eskoletan, familiei eta ikasleei zuzendua.
Irailaren 23an, astelehena, gonbidapena luzatuko diete ikasle, irakasle eta familiei autoa alde batera uzteko, eta bide-hezkuntzako saioak ere hasiko dituzte egun horretan. Prestakuntza bi astez egingo da, irailaren 23tik urriaren 4ra. Saio teorikoak eta praktikoak egingo dira, Udaltzainen eskutik.