Ekainaren 9an Europako Parlamentuko hauteskundeak izango dira eta EH Bilduk data horri begirako ekitaldia antolatu zuen atzo Laudion. Ainize Gastaka alkateak partekatu zuen oholtza Pernando Barrena hautagai europarrarekin eta Oihana Etxebarrieta eusko legebiltzarkidearekin.
Etxebarrietak bi ardatz izan zituen bere hitzartzean: Gazako genozidioa eta feminismoa. Izan ere, bere ustez, palestinarrek pairatzen duten bortizkeriaren kontrako jarrera Europara eraman beharra dago. Horrez gain, feminismoak egindako lorpenak kolokan daudela azpimarratu zuen, eskuin muturraren asmoa baita lortutako dena ezerezean uztea eta eredu atzerakoietara itzultzea. Azkenik, aldarrikatu zuen Euskal Herria nazio bat dela eta mezu hori zabaldu eta defendatu beharra dagoela erakunde europarretan.
Pernando Barrenak, bere aldetik, adierazi zuen garrantzitsua dela hauteskunde hauetan bozkatzea, ezkerrak hartzen ez dituen tokiak eskuin muturrak bereganatuko dituela argudiatuta, "herriei eta langile klaseei bizitza ezinezkoa egiteko".
Halaber, Barrenak gogor kritikatu zituen Europak ezarritako murrizketa politikak eta Laudioko Etengabeko Arreta Gunearen egoerarekin lotu zuen hausnarketa, iradokita EAJk politika horiek egikaritzen dituela. Ildo beretik, aldarrikatu zuen osasungintzara bideratu behar direla bitartekoak, gastu militarra handitu ordez.
Argazkiak: Naia Vallejo Torres