Ostiralean hasi zen Laudioko herrien jaia Aldai plazan eta atzo eman zioten jarraipena. Goizean txosnak eta salmenta postuak ireki ez ezik, Akelarre dantza taldearen eta Jose Luis Navarroren pregoia ere izan ziren protagonistak.
San Roke Kofradiako maiordomo ohiak hitza hartu zuen aldarrikatzeko Euskal Herria gainerako herriak bezain migratzailea izan dela eta gogoratu zuen Kofradia, hain zuzen, XVI. mendeko "izotzezko aro laburrean" sortu zutela, sekulako krisialdia egon zelako. Uzten beherakadaren, Felipe II.naren politika zentralisten eta gerren ondorioz, laudioar eta euskaldun askok erabaki zuten kanpora joatea.
Horrela, Navarrok positiboki baloratu zuen Laudion gertatutakoa migrazioaren ondorioz, tokiko kultura mantendu eta berritu delako, nahi izan dutenek euren jatorrizko kulturari eutsi diote zentroak eta elkarteak antolatuta, eta armonia izan da nagusi.
Hori bai, laudioarrak azpimarratu zuen hori ez dela beti zertan horrela izango eta nabarmendu zuen hauteskunde europarretan bozkatzeko beharra, migrazio politika gizatiarrak izateko, "Mendebaldeak ustez dituen baloreekin bat egiten dutenak".
Diskurtsoaren ondoren, jaiaren antolatzaileek oroigarria oparitu zioten Navarrori.