🔴 AMURRIOKO UDALAK DIRU-LAGUNTZA KENDU DIO ESKUALDEKO EUSKARAZKO KOMUNIKABIDE BAKARRARI 🔴
📝 Eman atxikimendua eta babesa Aiaraldea Komunikabideari, hemen sinatuta 👇
www.labur.eus/amurrioneuskarazbizinahidugu
📍 Ekainak 21, ostirala, AGERRALDI HERRITARRA Amurrioko Juan Urrutia plazan, 19:30ean.
Araian aritu zara Euskadiko Xake Txapelketan eta, beste jokalari bat kenduta, onena izan zinen. Nola baloratzen duzu emaitza?
Nire emaitzarik onena izan zen. Sorpresa handia izan zen. Maila handiko emakume eta gazteak bildu ginen.
Espero zenuen? Zergatik uste duzu egin zenuela horren ondo?
Ez, nire helburua ahalik eta ondoen jolastea eta puntu guztien erdia lortzea zen. Astean zehar hausnarketa egin ondoren, kontzentrazio eta atentzioa desbideratu barik jolastu nuelako izan daiteke. Auskalo. Buruak eta emozioak esku hartzen dute.
Lehen aldia da hain postu onean sailkatzen zarela?
Bai. Aurreko urtean bosgarren izan nintzen. Eta aurrekoan, Laudion izan zena, emaitza txarrak izan nituen. Baina emaitzak, emaitzak dira.
Hau lortuta, zein izango da zure hurrengo urratsa?
Jolasten segitzea da nire helburua xakean, bizitzak eta lanak ahalbidetzen badu. Euskal Herrian jokalari eta txapelketa anitzak daude, ofizialak zein sozialak, partida azkar edo mantsoagoekin. Internet bidez ere jolas daiteke.
Noiz hasi zinen xakean jokatzen eta zer diziplina eta prestaketa mota exijitu dizu kirol honek?
Unibertsitate ikasketen amaieran Xake Klubearekin kontaktatu nuen. Klaseak jaso nituen. Piezak mugitzen ikasi eta, prest sentitu nintzenean, jokoan murgildu nintzen. Ez dut entrenamendu espezifikorik hartzen, baina liburuak irakurri eta online partidak jolasten ditut. Niretzako dibertimentua da xakea.
Nolakoa da xake giroa?
Partida momentuan lehiakorra. Batzutan sufritzen da, eta ez irabazi edo galtzeagatik soilik. Izan ere, akats batek pikutara eraman dezake dena, nahiz eta partida bikaina egin. Aurkariak zuk baino hobetu jokatu badu, miresmena baino ez du merezi, eta partida amaitzean eskua eman eta umorea lasaitzen da.
Zer eman dizu xakeak zure bizitzan?
Bizitzan baliatu daitezkeen trebetasunak garatu ditut. Irtenbideak bilatu daiteke, nahiz eta galduta sentitu. Eta, batez ere, lagunak egin ditut.
"Judith Polgar da burura etortzen zaidan lehen jokalari handia, baina gertuago ditudan Laudioko jokalariak nabarmendu nahiko nituzke, estimu handian dauzkat"
Zure erreferentea den jokalaririk duzu?
Jokalari handiak erreferentzia moduan hartuta, Judith Polgar da burura etortzen zaidan lehena. Xake munduan ibilbide bikaina garatu egin zuen. Bestalde, gertuago ditudan Laudioko jokalariak nabarmendu nahiko nituzke, estimu handian dauzkat.
Zure aurkari guztiak ezagutzen zenituen?
Gehienak bai. Beste txapelketetan elkar ikusi dugu. Emakumezkoak ezagutzen nituen batez ere. Normalean Araban lehiatzen naiz, baina Bizkaira eta Nafarroara ere joan nahiz noizean behin. Bestalde, partaide batzuk faltan bota ditut, Euskal Herrian emakume jokalari anitzak daude eta.