Ebazteke dago oraindik nor izango den Laudioko Udaltzaingoaren buruzagia. Udal gobernuak atzoko plenoan eman zituen horri buruzko azalpenak, EAJren galdera bati erantzunez.
Ainize Gastakak zehaztu zuenez, bost hautagai aurkeztu ziren deialdira, eta horietako 2 “erabat aproposak” zirela ebatzi zen. Baina biek ala biek erabaki zuten karguari uko egitea, "arrazoi pertsonal eta ekonomikoengatik, lan baldintzegatik”. Alkateak nabarmendu duenez, ez da inolako “arrazoi politikorik” egon balizko bi hautagaien erabakiaren atzean.
Gastakak ziurtatu zuen honakoa “gai urgente eta garrantzitsu bat” dela, eta modu horretan tratatzen ari direla.
Otsailetik buruzagirik gabe
Otsailean erabaki zuen Udalak ordura arteko Udaltzaingoko buruzagia kargutik kentzea, “gertutasunezko polizia lortzera bidean” urratsak ematen hasteko.
Bere unean azaldu zutenez, "izendapen askearen bidez" hautatzen den kargua da polizien buruarena eta, beraz, "ohikoa" da udal gobernua aldatzen denean funtzio hori betetzen duen pertsona ere aldatzea. “2011n Bilduk hala egin zuen udal gobernu honetan sartu zenean, eta orain arte egon den pertsona aurreko udal gobernuak hautatu zuen”, gogoratu zuen Iñigo Martinez Cerrilo zinegotziak orduko hartan.