Aurreikusi zitekeen moduan, Omniak udal gobernua uzteko hartutako erabakiak isla nabarmena izan du astelehen honetako Udal Osoko Bilkuran. Hainbat puntu aurkeztu zituzten gai ordenetik kanpo, behin behineko aldaketa batzuk egiteko udal gobernuaren osaketan.
Gauzak hala, Nagore Gomara izendatu zuten alkateorde, Alvaro Barriosen lekukoa hartuz. EH Bilduren zinegotziak bere gain hartu ditu baita ere orain arte Omniaren eskuetan egon diren Zeharkako Politiken arloko azpi-arlo guztiak. Aitor Fernandez de Pinedok, aldiz, Gizarte Kohesioaren saila kudeatuko du, eta gainontzeko arlo guztiak Ainize Gastakaren ardurapean egotera pasako dira.
Hala ere, alkateak plenoan bertan argitu zuen antolaketa hori “behin behinekoa” dela, eta uztailean aurreikusi dutela forma ematea gobernu talde berriari.
Egin duten antolaketa "behin behinekoa" dela azaldu du Ainize Gastaka alkateak, eta aurreratu du uztailean eman nahi diotela forma udal gobernu berriari
Liberazioak eztabaidagai
Liberazioen nondik norakoak ere azaldu zituen Gastakak. “Hemendik aurrera udal gobernu honek lau liberazio izango ditu, nahiz eta momentuz ez dugun laugarren hori hartuko”, azaldu zuen gobernuburuak. Horrek eztabaida sortu zuen plenoan. Izan ere, EAJk zein PSE-EEk argudiatu zuten bozeramaileen batzordean beste gauza bat esan zitzaiela. Alkateak, aldiz, ziurtatu zuen batzorde horretan bertan azaldu zutela zer zen egingo zutena.
Gauzak hala, opozisioko bi taldeak abstenitu egin ziren bozketan. Egungo egoeran, Omniak liberazio erdi hartzeko aukera izango du, EAJk jada duen jardun osoa mantendu ahalko du eta PSE-EEk %17ko liberazioa hartu ahalko du. Hala ere, Loli Muriel zinegotzi sozialistak aurreratu zuen uko egingo diotela aukera horri.
Alkateak aurreratu zuen “ahalik eta lasterren” erabakiko dutela udal gobernu berriaren osaketa, eta horren arabera erabakiko dutela nork hartuko duen laugarren liberazioa.