Susa argitaletxeak eta EHAZE elkarteak antzerki-testuak argitaratzeko elkarrekin sortutako Ganbila bildumaren barruan plazaratu berri du Mikel Ayllon idazle laudioarrak “Hau ez da gerra bat” liburua. Hain zuzen ere, Mikel Ayllonek Piszifaktoria Ideien Laborategiarentzat idatzitako hiru lanekin osatu da: Bunker, Hau ez da gerra bat eta Hau gerra bat da.
Mikel Ayllonek azaldu duenez, hiru lan horiek giza harremanen erabateko porrotetik sortzen diren gerrak dituzte hizpide, ikuspuntu eta molde desberdinekin. Hiru lanek, halaber, “komunean dute euskal antzerkiarentzako kontatzeko modu eta lengoaia berriak bilatzeko nahi bat eta artista eta publikoaren arteko harremanak birpentsatzeko ahalegin bat”.
Igor Arzuaga da azalaren egilea eta Irati Agirreazkuenagak idatzi du hitzaurrea. Liburua dagoeneko eskuragarri dago liburudendetan, liburutegietan eta Susa argitaletxearen webgunean.
Piszifaktoria Ideien Laborategiarentzat idatzitako hiru lan
Hau ez da gerra bat Gasteizko Printzipal Antzokian estreinatu zuten 2023ko maiatzean. Hilabete lehenago, antzezlan horren hitzaurre gisa Bunker taularatu zuten Gasteizko Hibridalab zentroan. Hau gerra bat da ikuskizuna, aldiz, hilabete batzuk geroago aurkeztu zuten Bilboko Euskararen Etxean.
