Laudioko Arantzar kalean dagoen kamioien aparkalekuak sarbidea kontrolatzen duten sei langile ditu, Estacionamientos y Servicios enpresaren kide direnak. Azkenengo bi hilabeteetan txandakako grebak egin dituzte, “euren egoera prekarioa salatzeko”, estatu-mailako hitzarmena baitute, eta gutxieneko soldata kobratzen dute guztiek.
Astelehen honetan, hilaren 8an, beste hiru asteko grebari ekin diote. Izan ere, hitzarmena lortzeko bidean Udalarekin biltzeko asmoa zuten, baina, horrek, aldiz, zerbitzua eguneratu nahi du, eta aparkaleku barrutian etengabeko zaintza-sistema txertatu. ELAren arabera, aldaketa horrek eragin zuzena izan dezake lizitazioan, “ez baita aurreikusten egungo lanpostuek subrogazio-aukerarik izango dutenik zerbitzu berriaren kontratazioan”.
Sindikatuak Udalaren jarrera salatu du “grebalarien lan-baldintzak ez hobetzeaz gain, greba egin ondoren langileak kaleratzeko erabakia hartu” duelako. Ildo horretan, beraz, kaleratze arriskua eteteko eta lan-baldintzak hobetzeko mobilizatzen jarraituko dute kamioien aparkalekuko langileek, behintzat uztailaren 30era arte.