Irailaren 13tik 15era ospatuko dira Latiorroko jaiak aurten. Oraindik ez dute behin betiko egitaraua plazaratu, baina hainbat kontu aurreratu dituzte antolatzaileek. Bi berrikuntza nagusi nabarmendu dituzte: “Latiorro eskolaren eta Jesuri Guraso elkartearen inplikazioa gora doa: ardo dastatzea antolatuko dute lehenengo aldiz ostiralean”, azaldu dute. Horrez gain, “larunbateko herri bazkariaren osteko orduak indartu” egingo dituzte baita ere, batukada eta txapel jaurtiketa antolatuta.
Baina ez dira faltako ohiko jarduerak ere. Ostiralean familientzako ikuskizuna egongo da Traka Matrakaren eskutik, birziklatutako musika tresnak baliatuta. Larunbat goizean Elorritxuganera Mendi Martxa egingo dute. Irailaren 1etik aurrera irekiko dute izen ematea, Kirolprobak.com webgunean. Igandean, aldiz, ohiko marmitako txapelketaren XXXIII. edizioa egingo dute.
Egungo jai batzordeak 10 urte bete ditu festaren antolakuntzan murgilduta.
Musika eskaintza
Musika eskaintzari dagokionez, ohiko eskema mantenduko dute, tokiko sortzaileei lekua eginez. Gauzak hala, ostiralean Zinkha talde aiaraldearra izango da oholtzara igotzen lehena, Kaos Etilikoren txanda izango da gero, eta DJ Teso laudioarra arduratuko da gaua ixteaz.
Larunbatean aldiz, Walter Ego talde laudioarrak joko du lehenbizi, eta ondoren arituko da Periferia boskote kataluniarra. Jarraian, Gautaegun erromeria eta DJ Masa egongo dira, goizeko ordu txikiak arte. Gauargi erromeria, aldiz, igandea girotzeaz arduratuko da.
Jai batzordeak 10 urte
Egungo jai batzordeak 10 urte bete ditu festaren antolakuntzan murgilduta. Kide berri ugari batu dira bidean, baina nabarmendu dute ongi etorria izango dela “belaunaldi berrien, ostalarien eta auzoko talde guztien parte hartzea”. Bi modu daude batzordera batzeko: mezua bidaltzea lateorroko.jaiak@gmail.com helbide elektronikora, “edo irailean auzora hurbiltzea”.