Nondik dator zuen kuadrillaren izena?
Duela urteak Ikastolako, Latiorroko, Lamuzako eta La Milagrosako gazte batzuk elkartu ginen elkarrekin lokala alokatzeko asmotan. Lehenengo lokala Arbol Malato kalean eduki bagenuen ere, bigarrenak, Latiorroko Txindoki kalean alokatu genuenak, eman zion izena gure kuadrillari: Txindoki.
Zein da jaietako egunik onena? Zergatik?
Oso galdera zaila da erantzuten. Txupinazoaren eguna, Kuadrillen eguna, Baserritar eguna, Odoloste eguna… denak dira onak.
Bat aukeratu behar izatekotan, Baserritar eguna aukeratuko genuke, baina ez egitarauarengatik, aspalditik egun horretan kuadrillako baten txokoan egiten dugun bazkariarengatik baizik. Urteek aurrera egin ahala, lana dela, familia dela, gero eta zailagoa da hogeiok elkar ikustea, baina bazkarira inork ez du hutsik egiten.
Zergatik erabaki duzue Jai Batzordean parte hartzea?
Urteak generamatzan zalantzan, eta pasa den urteko sanrokeetan erabaki genuen pausoa emango genuela. Gu guztion herria da, eta jaietan orain arte murgildu garena baino gehiago murgiltzeko motibazioa da.
"Ekintza asko dira gogoko ditugunak. Txupinazoaren eguneko gosaria, Kuadrilla eguneko bazkaria eta Zoroak kuadrillak antolatutako Muturreko Herri-Kirolak, besteak beste. Argi geratzen da jatea eta edatea gustatzen zaigula, ezta?"
Egitarauko zein ekintzetarako zaudete gogotsuen? Zergatik?
Egitaraua oso zabala da, eta ekintza asko dira gogoko ditugunak. Txupinazoaren eguneko gosaria, Kuadrilla eguneko bazkaria eta Zoroak kuadrillak antolatutako Muturreko Herri-Kirolak, besteak beste. Argi geratzen da jatea eta edatea gustatzen zaigula, ezta?
Zein uste duzue izango dela txosnetan gehien entzungo den abestia?
Isabel Aaiunen Potra Salvaje.
Zein duzue gustukoen: bafle-poteoa, batukada edo elektrotxaranga?
Ia edozerk balio digu, baina, egia esan, oso elektrotxaranga zaleak gara. Giro ona sortzen dute eta, gutxi egiten badugu ere, abesteko eta dantzatzeko aukera ematen digute.
Zerk egiten ditu Laudioko jaiak berezi?
Kuadrillok egiten ditugu Laudioko jaiak berezi, Laudioko gazteon antolakuntzak eta parte hartzeak. Kuadrillarik gabe ere existitu ziren eta existituko lirateke sanrokeak, baina ez lirateke gauza bera izango.