Laudioko Udalak ohar bidez zabaldu duenez, urtez urte, ahalegina egiten du baliabide ekonomikoen falta euskara ikasteko oztopo izan ez dadin. Ildo horretan, 2023-2024 ikasturtean parte hartu duten pertsonei euskara-bekak ordaindu zaizkie. Guztira, 139 eskabide aurkeztu dira laguntza-deialdira, eta iaz 103 aurkeztu ziren. Horietatik 136 ordaindu dira, aurreko ikasturteko 96 eskabideen aldean.
“Datu positiboa da” Udalaren iritziz, laguntza hori jaso duten ikasleen kopurua %42 hazi baita. Bestalde, eskatzaileen % 67 emakumeak direla nabarmendu du Udalak.
Ildo horretan, aurtengo euskara beken deialdian sartutako ildo politikoa lantzen jarraituko du Udalak: eskaera guztiei matrikularen %50 bermatzea eta langabezian daudenei %100 itzultzea. Irizpide berri horrek Udalak eskatzaile bakoitzari ordaindutako zenbatekoa handitzea ekarri du, eta hori guztizko inbertsioan islatu da, %84 hazi baita, 2023an 16.061€ izatetik 2024an 29.561€ izatera igarota.
Aurten, berrikuntza gisa, 2007an edo ondorengo urteetan jaiotako pertsonek zuzenean jasoko dute diruz lagundu daitekeen gastuaren %100, beren lan-egoera kontuan hartu gabe, eta matrikulatu daitezkeen adingabeek euskara ikastea doakoa izango dela bermatuta.
“Pozgarria da gure herrian urtez urte euskaldunen kopurua handitzen ari dela ikustea. Azpimarratzekoa da ikastaro gehienak Udal Euskaltegian eta Berbots-AEK Euskaltegian egin direla. Kopuru hori handitzen jarraitzeko asmoz, lanean jarraituko dugu Udaletik, euskara ikasteko doakotasuna bermatzeko”, adierazi du Nagore Gomara Laudioko Udaleko Hizkuntza Politiketako zinegotziak.
Udalak, bere aldetik, gogorarazten du udako euskara ikastaroetarako ere bekak emango direla eta eskaerak aurkezteko azken eguna urriaren 15a izango dela.