Uda hasieran jarri zituzten martxan Laudioko Ezka kalea oinezkoentzat atontzeko lanak, eta dagoeneko amaitu dira. Laudioko Udalak adierazi duenez, inguruko merkataritza eta tokiko ekonomia bultzatzea zen ekimen honen helburua. Izan ere, Merkataritza Mahaian adostu zen proiektua eta “Laudioko Apill merkatarien eta ostalarien elkartearen eskaera historiko bati” erantzuten dio.
Udalak azaldu duenez, herritarrentzat “gune atsegin eta erakargarria sortzea” izan da Laudioko erdigunean dagoen kale hau oinezkoentzat jartzearen xedea. Izan ere, tokiko erakundearen aburuz, modu honetan “bizitza kalera itzultzen da, sarbidea erraztuz eta inguruko saltokietarako zirkulazioa handituz”.
Uztailean egindako saio ireki batean auzokideek kaleko zoruak izango zuen irudia erabaki zuten. Proposatutako bost diseinuen artean, forma geometrikoak eta koloreak uztartzen dituen hau hautatu zuten, Taika enpresak sortutakoa. Gainera, Laudioko jaiak amaitzean, zoruko diseinuarekin bat egiten duten modulu batzuk jarriko dituzte bertan, “elementuen arteko espazio harmoniatsua” eratzeko.
Zabaldutako oharrean, Udalak gogorarazi nahi izan du “gune berri honen funtzionamendua udalerriko oinezkoentzako gainerako guneetan aplikatu beharreko arau berberen arabera arautuko dela. Halaber, urtarrilean prozesua baloratzeko bilera bat deituko dutela ere iragarri du.