Ate joka daude Latiorroko jaiak, nola doaz prestaketa lanak?
Lan asko egin dugu honezkero, eta lana dugu aurretik oraindik ere. Denbora inbertsio handia eskatzen du jaiak prestatzeak, urtez urte anbizio handiagoarekin antolatzen ditugulako. Beti ari gara hobetu nahian, gauzak hobeto antolatzeko ahaleginean, espazio anitzagoak eta zabalagoak eraikitzeko.
Jai Batzordeak urteak daramatza festak antolatzen, nolakoa izan da urte hauetako ibilbidea? Asko aldatu da ospakizuna azken urteetan?
Azken urteak nahiko gogorrak izan dira. Izan ere, jende gutxi batu gara jaien antolakuntzan. Zorionez, aurten auzokide berriak batu dira Jai Batzordera, eta gauzak desberdin ikusten ditugu. Gaur egun hamar kidek osatzen dugu Latiorroko Jai Batzordea. Apirila eta maiatza bitartean egiten ditugu lehenengo bilerak, irailerako dena prest izateko.
"Zorionez, aurten auzokide berriak batu dira Jai Batzordera, eta gauzak desberdin ikusten ditugu"
Urtero saiatzen gara ekintza berriren bat gehitzen programaziora, aurten batukada bat ekarriko dugu Latiorroko kaleak girotzeko asmoz.
Zer prestatu duzue aurtengo jaietarako?
Urteroko eredu bera jarraitu dugu aurten ere. Larunbateko herri bazkaria nabarmenduko genuke ekintza nagusien artean; 400 lagun elkartuko ditugu bertan. Jaietako igandeko marmitako txapelketak ere jendetza erakartzen du auzora.
Zer dute berezi Latiorroko jaiek?
Auzokideon parte hartzea oso altua izaten da jaietan, eta horrek egiten ditu berezi gure festak. Herritarrak beti daude prest ekintzetan parte hartzeko edota antolakuntzan laguntza eskaintzeko.
Azkenik, zer mezu bidali nahi diezue asteburuan auzoko festetara hurbilduko direnei?
Inguruko herritar guztiei luzatu nahi diegu Latiorroko jaietan ondo pasatzeko gonbita, beti ere errespetuz jokatuz.