Urtero antolatzen da Laudion Euskal Jaia, baina aurtengo edizioa ohikoa baino bereziagoa izango da, hainbat eragilek indarrak batu dituztelako bi eguneko egitaraua antolatzeko. Basalarrinak, Suziri Jai Batzordeak eta Kirikiñok atera dute aurrera ekimena, Udalarekin elkarlanean, eta gaur arratsaldean egin dute programa aurkezteko agerraldia.
Irailaren 27an hasiko da jaia, arratsaldeko bostetan. Umeentzako tailerrak, txokolatada eta buruhandi mitologikoen erakustaldia eskainiko dituzte plazan.
400 lagunentzako bazkaria
Larunbatean, aldiz, baserritarren merkatua, herri-kirol irekiak eta Akelarre dantza taldearen ikuskizuna egongo dira Aldai plazan, goizean zehar. Toki berean egingo da gero herri bazkaria. Aurreratu dutenez, 400 tiket jarriko dituzte salgai Gorka eta Ilargi tabernetan, 10 euroren truke.
2.000 pegatina eta 700 txapa banatuko dituzte hizkuntza ohituretan eragiteko
Bertsoek hartuko dute protagonismoa bazkalostean, Juanjo Respaldiza, Oihane Perea, Manex Agirre eta Maddalen Arzallusekin. Serapio Lopez baranbioarra arituko da gai-jartzaile lanetan. Horrez gain, bingo musikatua eta mus-lehiaketa ere egongo dira, 16:30ean.
Musikak hartuko du protagonismoa arratsaldean, kantukada egingo baita herriko kale nagusietan barrena. Irrintzi txapelketak hartuko du gero lekukoa, arratsaldeko zortzietan. Nøgen talde ospetsua arduratuko da gaueko txanpari hasiera emateaz, eta bere ostean igoko dira Aldai plazako oholtzara Zirkinik Bez erromeria eta Aztarnak DJek.
Jaitik harago, hizkuntza ohituretan ere eragiteko asmoa dute antolatzaileek. Horretarako, 2.000 pegatina eta 700 txapa banatuko dituzte, "Badakit badakizula. Egin dezagun euskaraz" lemarekin.
