Palestinaren aldeko elkarretaratzea egingo da Laudion urriaren 7an, eta Aiaraldeko Gure Eskuk jende guztiari dei egin dio bertara bil dadin.
Hala azaldu dute ohar baten bidez: "Izuturik, sekula uste izango ez genuen bezala, munduan gure garaiotan beste genozidio bat ikusten dugu, Palestinako gizaki guztien aurka, heriosuhar, Israelek, Israelgo gobernu kriminalak egiten duena. Eta sekula ikusi nahi ez genukeena ikusiko dugula beldurrak jota gagoz, Gazako herri xumearen aurkako sarraskia Libanora zabalduko baitu. XXI. mendeon, ondorio gaiztoz, III. Mundu-guduaren atarian jarri gaitu nazien guztizko gaiztakeria eredu hartu duen Israelek".
"Europarrok, zibilizatuak omen garen herrialdeetako jendeok eta gure ordezkariek eta agintariek, batez ere, badugu errua, badugu erantzun beharra eta badugu triskantza hori geldiaraz dezaten egiteko beharkizuna, guztiz ere. Milaka lagunentzat berandu bada ere, beste milaka hil baino lehenago, gure gizatasunak XXI. mendeko nazismoari aurre egin behar dio, nork bere kontzientziatik hasita", adierazi du erabakitzeko eskubidearen aldeko eragileak.
Horregatik guztiagatik, Aiaraldeko Gure Eskuk, "munduko herri guztien askatasuna eta bakean bizitzeko eskubidea aldezten duen heinean, Palestinaren aldeko ekitaldi guztietan izango da, eta herriko jende guztiari dei egiten dio, bai Iruñean eta Bilbon hurrengo urriaren 5ean, bai Laudion 7an egingo diren elkarretaratze handietara bil dadin".