Laudioko Udalak adierazi du udalerriko 660 etxebizitza hutsen jabeek %50eko errekargua ordaindu beharko dutela Ondare Higiezinen Zergan. Tokiko erakundeak errekargu hori ezarri die higiezin horiei guztiei, ohiko bizilagunik ez dutelako. Modu horretan, erabilerarik ez duten etxeak alokairuko merkatura eraman nahi ditu EH Bilduren gobernu taldeak.
Zehazki, honako hau da etxebizitza hutsen banaketa Laudion, auzuneka:
| Herrigunea (zentroa) | 347 |
| Ugarte | 82 |
| Latiorro | 79 |
| Areta | 73 |
| Landaluze | 37 |
| Gardea | 28 |
| Arraño | 14 |
Berez, ondare horien jabeek urriaren 24ra arte izango dute alegazioak aurkezteko epea. Iñigo Martinez Cerrillo zinegotziak adierazi duenez, "etxebizitza horien jabeei jakinarazpen bat bidaliko zaie beren etxeetara, kobrantzaz ohartarazteko. Nolanahi ere, eta ordainagiria igorri ondoren, alegazioak aurkezteko epe berri bat ezarriko da".
Gobernu taldeak gogoratu du iaz 42.000 eurorainoko errentetarako hobari-taulak handitu zituela, eta neurri bera hartu zuela alokairu publikoko programa baten barruan (Alokabide) dauden etxebizitza hutsetarako, trantsizio ekosoziala bizkortzea helburu duten etxebizitzetarako, eta, bereziki, energia kontsumoa murrizten dutenentzako. Halaber, tokiko erakundeak azpimarratu du alokairurako programa publikoetan ez dauden etxebizitza hutsei ezarri zietela errekargua.