Igandean izango da Boluntarioen III. Azoka Laudion

Aitor Aspuru Saez 2024ko urr. 4a, 13:30

Duela bi urteko edizioaren irudia. / Laudioko Udala

Irabazi-asmorik gabeko hamahiru elkartek parte hartuko dute ekimenean euren lanaren berri emateko. Iaz Amurrion egin zuten eta aurten Laudiora itzuliko da urteroko zita.

Laudioko Herriko plazak irabazi-asmorik gabeko hamahiru elkarte hartuko ditu igandean, 11:00etatik 14:00ak arte. Topaketaren helburua da herritarrek ezagutzea talde hauek dituzten proiektuak eta, nahi izanez gero, urratsa egitea eurekin boluntario lanetan aritzeko.

Horretarako, informazio postuak jarriko dituzte, non galderak erantzungo dituzten eta boluntario izateko izena emateko aukera zabalduko duten. Horrez gain, tailerrak, hitzaldiak, trebakuntza saioak eta jolasak ere egingo dituzte, bingoa barne.

Ekitaldia Batekin Arabako Boluntariotza Agentziak antolatu du, Aiaraldean elkartasuna sustatzen jarraitzeko eta interesa duten pertsonei komunitatean eragin zuzena duten proiektuetan parte hartzeko aukera emateko.

Aiaraldeko III. Boluntariotza Azokari buruzko informazio gehiago nahi izanez gero, jo www.batekin.org helbidera edo jarri harremanetan Laura Gonzalezekin 688763095 telefonora deituz edo aupa@batekin.org helbidera idatziz.

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide