San Roke Racing Clubak 1 Formulako jarraitzaileentzako hitzaldia prestatu du larunbatean. Ekitaldiaren protagonista Carlos Bertrand Merino izango da, hau da, Espainiako Estatuan egon den FIA lasterketa baten zuzendari bakarra.
Bertrand Merino Kantabrian jaio zen 1947an eta 1969an fisika teorikako lizentziaduna bilakatu zen Madrilgo Complutense unibertsitatean. Sidenorreko langilea izan bazen ere, bere zaletasun handiena 1 Formula izan da, non funtzio ugari bete dituen FIAn. Adibidez, Formula 1eko Espainiako Sari Nagusi lasterketako zuzendaria izan zen 1989 eta 2002. urteen artean. Europako Sari Nagusiko zuzendaria ere izan zen hiru urtez.
Horrez gain, komisarioen presidentea izan da FIA GTn, besteak beste. Rallyen komisario gisa ere aritu da. Antolatzaileen asmoa da 1 Formulako mundua ezagutaraztea barrutik eta, euren ustez, horretarako aparteko gonbidatua izango da Carlos Bertrand Merino.
San Roke Racing Cluba duela urtebete baino gutxiago sortu zen eta ekimen honekin motorzaleak bildu nahi dituzte larunbatean.