Alter nation proiektuan buru-belarri sartuta, sormen egonaldia garatu du Idoia Tapiak Faktorian. Iragan ostegunean jendaurrean aurkeztu zituen egonaldiaren fruituak, entsegu ireki batean.
Ahots efektu artifizialekin "esploratu eta esperimentatu" du Tapiak Faktorian igaro duen astebetean, arte dramatikoen ikasketen gradu amaierako lanari segida emanez. Sortze prozesuan betean dagoen pieza da egonaldian mamitu duena, eta datozen hilabeteetan jarraituko du honi forma ematen.
Tapiaren piezak identitatearen nahasmendu disoziatiboa du hari eroale. "Trastorno psikologikoa da honakoa, haurtzaroko trauma sakon batek eragindakoa", azaldu du sortzaile nafarrak.
Antzerkia eta musika nahasten dituen pieza performatiboa garatzen ari da Idoia Tapia, ahotsa izanik tresna nagusia. "Ahotsarekin konexio handia daukat, asko fijatzen naiz jendearen ahotsan, eta asko interesatzen zait soinu bezala", adierazi du.
Arte Eman Festa
Idoia Tapiaren lanaz gozatzeko aukera berri bat egongo da datorren larunbatean (azaroak 23), Faktorian ospatuko den Arte Eman Festan. Arte Hartze Zikloari amaiera emango zaio emanaldi horrekin, eta sormen egonaldietan izandako sortzaileek euren lanak erakutsi eta elkarbanatuko dituzte.
Erakusketa-jaialdiaz gozatzeko sarrera bikoitz baten zozketa egingo du Aiaraldea Komunikabideak. Hemen eman daiteke zozketan parte hartzeko izena.