Faktoriak mahai inguru berezia jasoko du abenduaren 2an, astelehenean, 19:00etan. Ez horrenbeste gaiatik (kartzela, gurasotasuna eta seme-alabatasuna), baizik eta ereduagatik. Izan ere, Joxe Blanco euskal preso politiko ohi laudioarrak ipuina sortu du bere esperientzia azaltzeko eta kontakizunaren atalen artean Eztizen Artola Iturratek, Ilazki Ussiak eta Ainhoa Ayestak hartuko dute hitza zenbait galdera erantzuteko.
Ez da lehen aldia Joxe Blancok ipuina idazten duela. Izan ere, preso izan zenean bat sortu eta argitaratu zuen Ataramiñe argitaletxearekin.
Eztizen Artola Iturrate bilbotarra, berez, Gurpilak eleberriaren egilea da. 'Parot Doktrina' deiturikoa ezarri zioten bere aitari eta, ondorioz, legez kanpo luzatu zuten bere espetxealdia. Txalaparta argitaletxean plazaratutako liburuan esperientzia pertsonalak beste motxiladun umeen bizipenekin uztartu ditu, orain arte literaturan gutxi jorratu den gaiaren bidea urratzeko.
Ilazki Ussia aiaraldearra ere "motxiladun umea" izan da. Hau da, bere aita espetxean bisitatu behar izan zuen euskal gatazka politikoaren ondorioz, eta bere bizitzan ezagututakoa partekatuko du.
Azkenik, Ainhoa Ayestak ere parte hartuko du mahainguruan. Ayesta euskal preso politikoen eskubideen aldeko ekintzailea izan da eta hainbat aldiz jo du espetxera senide eta lagunekin.
Solasaldia erabat irekia eta doakoa izango da.
