Aiaraldeko pentsiodunek manifestazioa egin dute gaur eguerdian Laudion, astelehenetan egiten duten elkarretaratzearen ondoren.
Foru Aldundiaren bulegoetaraino joan dira, ondorengo aldarri hauek plazaratzeko:
- Espainiako Auzitegi Gorenaren 255/2023 epaiaren ondoriozko ordainketak ofizioz egitea, dagokien erreklamazio-eskaera egin beharrik gabe, Bizkaian eta Gipuzkoan egin den bezala.
- 2018. urtea ere sartzea, ondorio guztietarako. Izan ere, Arabako Foru Aldundiak azken bost urteetako errenta aitorpena egin bada soilik ordaintzen ditu ordainketa horiek. Erreklamazioa 2024ko ekainaren 25aren ostean egiten bada, 2018ko ordainketa galduko da.
- Azken urteetan hil diren pentsiodunen oinordekoei eta kobratzeko eskubidea duten pertsona guztiei postaz jakinaraztea zorraren ordaina erreklamatzeko aukera dutela.
Pentsiodunen mugimenduak gaineratu du adineko pentsiodun askok (bakarrik bizi direnak, egoitzetan daudenak, aholkatzeko eta laguntzeko inor ez dutenak eta abar) ez dutela epai honen berri izan. Beraz, pentsiodun horientzat ezinezkoa izango da diru hori kobratzea, gaur egungo eskakizunagatik, erreklamazio-eskaera idatziz egin behar delako nahitaez.
Dirua itzultzeko eskaera
Espainiako Auzitegi Gorenaren 255/2023 epaiak 1978ko abenduaren 31a baino lehen Lan Mutualitateetan kotizatu zuten beharginei eragiten die. Ebazpen horren arabera, bere garaian ez zen kenkari bat kontuan hartu eta, ondorioz, dirua itzultzeko eskatu dezakete langileek. Arabako Foru Aldundian egin behar da horretarako tramitea.
📸 ARGAZKIAK | Aiaraldeko pentsiodunek manifestazioa egin dute gaur Laudion, 255/2023 epaiaren ondoriozko ordainketak ofizioz egitea eskatzeko.
— Aiaraldea.eus (@aiaraldea) December 16, 2024
Ikusi argazki galeria hemen:https://t.co/H3rDPbJk75 pic.twitter.com/lVWWnvd49H