EAJk oharra zabaldu du defendatzeko Eusko Jaurlaritzak eta euskal erakundeek, oro har, Guardian enpresako labearen itzaltze prozesuan egin dutena. "Prozedura hori Eusko Jaurlaritzako, Osalaneko eta Industria eta Ingurumen Sailetako teknikariak ikuskatzen ari dira. Gainera, Guardianeko jarduerarekin jarraitzeko interesa duten inbertitzaileak guztiz informatuta daude prozesuari buruz, eta proiektuan sartzea bermatzeko biderik onena dela uste dute", adierazi dute.
Izan ere, EAJk lasaitasun mezua zabaldu nahi du eta aipatu du labearen itzalketak ez duela esan nahi lantegia "berehala eta atzera bueltarik gabe ixtea". Horrela, jeltzaleek babestu nahi izan dute euskal erakundeen lana eta azpimarratu dute "modu serio eta koordinatuan" ari direla lanean, "lantegiaren bideragarritasuna eta Laudioko enpleguaren babesa bermatzeko".
"Informazio nahasi" eta "mezu ezkorrak"
Jeltzaleek oharra plazaratu dute, euren ustez, "informazio nahasiak" komunikatzen ari direlako eta errepikatu dute EAJren eta Eusko Jaurlaritzaren lehentasuna dela Guardian enpresako enpleguak mantentzea.
Halaber, jeltzaleek azaldu dute euren konpromisoa egungo eta etorkizuneko lanpostuekin dela eta horiek erakartzeko "eskualdeko eragile guztiek, politikoek, ekonomikoek eta sozialek, haien garapenean laguntzeko erantzukizuna dugu. Esperientziak erakusten du euskal erakundeekin etengabe eta koordinatuta lan egitea dela aurrera egiteko estrategiarik onena, gizartearen eta ekonomiaren aurrerapena soilik geldiarazten duten diskurtso eta mezu ezkorretan erori beharrean".