Arabako Bertso Kuadrillen Arteko Txapelketa dela eta, herriz herri hasi dira bertso egunak antolatzen. Izan ere, aurten kanporaketak finalerdietan hasiko dira zuzenean. Gauzak horrela, larunbatean egin zuten Aiaraldekoa, Aretan.
14:30ean hasi zen bazkaria eta ondo jan ostean ekin zioten kantatzeari hainbat bertsolarik. Bi talde batu ziren: Aiaraldeko Altubepekoak (Serapio Lopez, Unai Mendibil eta Iñaki Cabeza) eta Arrigorriagako Estropozu bertso eskola (Iker Garaitagoitia, Arkaitz Zipitria, Peio Molinuevo eta Aitor Arrutia).
Horrez gain, eta besteek animatu eta gero, Aretako bertso eskolako ume batek ere parte hartu zuen egunean eta kalera atera zirenean, koplak kantatu zituen.
Ofizio ezberdinak egin zituzten: zortziko handia, zortziko txikia, puntuka, erantzuna... Iñaki Cabezaren aburuz, "ofizio polit bat, gai bat hiru bertsolariren artean, bertso bat bakoitzak eginda".
Aretako Kultura Etxea utzita, inguruko bi tabernetara joan ziren eta kalean ere bertso poteoan jarraitu zuten. Hainbat ofizio landu zituzten: hitz bat asmatu, puntuka, zortziko handia eta txikia...
Martxoan txapelketa
Iñaki Cabezak azaldu duenez, larunbateko Bertso Eguna egin dute erabaki delako zuzenean finalerdiak kantatuko direla Arabako Bertso Kuadrillen Arteko Txapelketan.
Hortaz, bertso egun horiek baliatzen ari dira entrenatzeko txapelketara begira. Martxoaren 15ean izango da hurrengo hitzordua Amurrion. 14:00etan bazkaria izango da Mendiko Eskolan eta 17:00etan saioa. Hiru talde arituko dira: Jainkoaren Seme-alabak (Trebiñu), Bersoespuela (Mendialdea) eta Altubepekoak (Aiaraldea). Irabazleak finalean parte hartuko du.
Argazkiak: Aiaraldeko eta Arrigorriagako Bertso Eskolak