Laudioko EAJk EH Bilduren gobernu taldearen jarduna salatu du, "gardentasunik eza eta etengabeko faltsukeriak" leporatuta. Jeltzaleek zabaldutako oharrean adierazi dutenez, gobernu taldeak ez die helarazten eskatutako informazioa, hainbat bidetatik eskatu ostean ere ez.
Ander Añibarro EAJren bozeramailearen arabera, "azken osoko bilkuran, baina baita beste foro batzuetan ere, hala nola bileretan eta batzordeetan, EH Bildu agerian geratu da, askotan egiari muzin egin ondoren", eta jeltzaleen ustez, "horrek guztiak kudeaketan duen zorroztasun falta eta informazioa ezkutatu eta faltsutzeko duen joera erakusten du".
Oposizioko taldeak azpimarratu du jarrera horrek ez diela bakarrik haiei eragiten, baizik eta herritarrei eta horietako asko erantzunik ez jasotzeagatik kezkatuta agertu direla azaldu du. EAJk Ainize Gastaka alkateari azalpenak eskatu dizkionean emandako erantzunak "onartezinak" direla iritzi dute jeltzaleek, alegia "profesionalak ez zirela" eta "erratu" daitezkeela.
Gauzak horrela, udal talde jeltzaleak idazki bat erregistratu du, alkateak eskuratu nahi duten informazio guztia eman diezaien, beharrezkoa baitzaie "lana arduraz egin ahal izateko". Bide horretan, adierazi dute informaziorik jaso ezean, beste instantzia batzuetara jo beharko dutela, informazioa lortzeko duten eskubidea babesteko.