Mugagabe Trail Lasterketaren edizio berria egingo dute larunbatean. Goikogane, Mugarriluze, Kamaraka, Arrabatxu, Alpitxu eta inguruko hainbat mendi zeharkatuko ditu, eta bikoitza izango da. Alde batetik, proba luzea egongo da, 28 kilometrokoa dena eta 1.800 metroko desnibela duena. Bestetik, ibilbide laburra egongo da, 11 kilometrokoa eta 630 metroko desnibelekoa.
550 lasterkarik eman dute izena proban
Luzeena 09:15ean abiatuko da Laudio Institututik eta laburragoa dena, aldiz, 10:00etan. 11 kilometroko ibilbidea 12:05ean amaituko beharko dute parte hartzaileek eta 28koa 14:30ean.
Lasterkari ugari espero dira herrian. Izan ere, agortu dira dagoeneko dortsal guztiak eta 550 kirolari bertaratuko dira orotara. Horrez gain, 50 boluntario arituko dira antolakuntzan, Ivan de la Cruz antolatzaileak adierazi duenez.
Aiaraldeko Mendiak Bizirikekin elkarlana
Kirol jarduera naturari lotuta dagoenez, Aiaraldeko Mendiak Bizirik plataformak aukera baliatuko du, antolatzaileekin elkarlanean, zentral eolikoen kontrako mezua zabaltzeko.
Ferosca I zentral eolikoaren kontrako alegazioak jaso eta elkarretaratzea egingo du Aiaraldeko Mendiak Bizirik plataformak lasterketa baliatuta.
Horrela, informazio mahaia jarriko dute Laudio Institutuan eta, aldi berean, aukera emango dute Ferosca I proiektuaren kontrako alegazioak sinatzeko. 09:45ean argazkia egingo dute ibilbide laburra egingo dutenekin eta 13:30ean elkarretaratzea deituko dute Lamuza plazan.
Plataformak hurrengo astean zabalduko ditu alegazioak, martxoaren 14an amaitzen baita epea aurkezteko, baina larunbatean bertan ekin nahi diote horiek lantzeari.