Abenduaren 21ean egin behar zuten Laudio II. Eskalada Txapelketa, baina azken unean bertan behera uztea erabaki zuten, Santo Tomas jaiarekin bat egiten baitzuen. Gauzak horrela, Haitzetan Gora Mendi Taldeko kideek aukera baliatu dute martxoaren 29an berriro antolatzeko eta lehiaketa zabaltzeko eta aniztasuna emateko.
Ondorioz, martxoko azken asteburuan lau kategoria egongo dira lehian parte hartzeko. Goizez umeek eta nerabeek hartuko dute rokodromoa 9:00etatik aurrera. Izan ere, bederatzi urte azpiko, hamabi urte azpiko eta hamalau urte azpiko kategorietan multzokatuko dituzte.
Hamabost bloke eskalatu beharko ditu eskalatzaile bakoitzak eta ordubete izango du horretarako.
Sariak egongo dira irabazleentzat, baina zozketak ere egingo dituzte parte hartzaile guztien artean. Amaitutakoan, askaria egongo da guztientzat.
Arratsaldean helduak
Helduen txanda arratsaldean izango da. Gehienez 75 lagunek parte hartuko dute eta 25 lehiakideko txandetan arituko dira. Finalean bost emakumezko eta bost gizonezko egongo dira 19:30ean, nor baino nor trebeago.
Berez, lau bloke eta bide bat osatu beharko dute eta irabazleak sarituko dituzte.
Parte hartzaileek ere zozketa bidez eskuratu ahal izango dute saria. Proba bukatzen denean mokadua egongo da kirolari zein ikusleentzat.
Izen ematea
Aintzat hartu beharra dago parte hartzaileen kopurua mugatua dela. Umeen eta nerabeen artean 30 eskalatzaile lehiatuko dira kategoria bakoitzeko, 90 guztira. Helduen artean, aldiz, 75 lagunek emango dute izena. Adingabeek 8 euro ordainduko dituzte eta nagusiek 15. Inskripzioa hemen egin daiteke.